Halim Gashi është bërë kampion i Zvicrës në taekwondo në vjeshtë, por nuk iu bashkua ekipit përfaqësues për shkak se është i përqendruar në praktikën si hidraulik.
Gashi është një prej rreth tre mijë personave që merren me taekwondo në Zvicër.
Është 17-vjeçar dhe jeton në Escholzmatt, kurse kësaj disiplinë olimpike iu bashkua para gjashtë vjetësh.
“Taekwondo është përzierje e karatesë dhe kikboksit. Është e rëndësishme për zhvillimin e vetëdisiplinës – agresiviteti nuk ka vend këtu”, thotë Halimi, shkruan të enjten “wochen-zeitung.ch”.
“Mua më pëlqejnë edhe artet e tjera marciale, por në taekwondo teknika e këmbës, shpejtësia dhe dinamika janë shumë të theksuara. Kjo më pëlqen shumë”, ka thënë Gashi.
Edhe
Pensionohet Mehdi Gashi, një prej figurave të veçanta të basketbollit kosovar
Gashi ka nisur të merret me taekwondo për shkak të babait të tij. Ai gjithmonë ka qenë i mahnitur nga artet marciale dhe vazhdimisht e ka përkrahur Halimin dhe vëllain e tij të vogël.
“Babai im është gjithmonë këtu – në stërvitje dhe turne. Ne jemi babë e bir, por në të njëjtën kohë jemi kolegët më të mirë”, thekson sportisti shqiptar.
Gashi stërvitet tri herë në javë në Schupfheim me trajnerin e tij, Michel Heldner.
“Më pëlqejnë luftërat. Nëse kam turne dhe e fitoj atë, zakonisht nuk jam shumë i kënaqur. Dua që të kthehem në luftëra me përmirësime në veten time. Por, natyrisht duhen shumë stërvitje”, thotë Gashi.
Muaj më parë Gashi e mbrojti titullin e kampionit të Zvicrës në konkurrencën e juniorëve, në kategorinë deri në 71 kilogramë. Ai dëshiron tani të jetë pjesëmarrës në kampionatin e Zvicrës 2023.
Dhe do të jetë viti kur do të debutojë me seniorët.
Edhe
Boksieri kampion nga Durrësi vjen në Prishtinë për stërvitje
Gashi jeton me prindërit e tij dhe është me prejardhje nga Kosova. Është i lidhur shumë me Kosovën.
“Më pëlqen Kosova – në dimër ka borë, në verë temperaturat ndonjëherë shkojnë deri në 40 gradë. Por tri javë pushimi duke mos bërë asgjë tjetër, më mungon struktura dhe jeta e përditshme e Zvicrës. Ndihem më shumë se në shtëpi në Escholzmatt”, ka thënë ai.
