Franca ka kaluar në finale të Eurobasketit, duke mposhtur shumë thellë Poloninë në gjysmëfinalen e parë. Të premten mbrëma në Berlin, Franca fitoi me rezultatin 95:54. Francezët kanë dominuar gjatë tërë ndeshjes dhe kanë lënë pa gjasa Poloninë që kishte befasuar Slloveninë në çerekfinale.
Në dy çerekët e parë, Polonia ka shënuar vetëm nga nëntë pikë, ndërsa ka pranuar 15 përkatësisht 19. Me vetëm 18 pikë në një pjesë, Polonia ka thyer disa rekorde negative sa i takon Eurobasketit.
Franca ishte bindëse edhe në pjesën e dytë, duke fituar 30:18 dhe 31:18.
Guerschon Yabusele udhëhoqi Francën me 22 pikë e katër kërcime. Moustapha Fall shënoi gjashtë pikë, por i kishte edhe dhjetë kërcime e pesë asistime.
Te Polonia asnjëri lojtar nuk ishte në nivel. A.J. Slaughter dhe Michal Michalak ishin më efikasët me nga nëntë pikë.
