E ardhmja e Gianluigi Donnarummas mbetet në ajër, por fitorja e Milanit ndaj Juventusit mund të përcaktojë qëndrimin e portierit në klubin kuqezi.
Kontrata e 22-vjeçarit skadon në fund të sezonit dhe Juventusi thuhet se është i interesuar ta marrë si lojtar të lirë. Megjithatë, portieri Donnarumma dëshiron të luajë në Ligën e Kampionëve sezonin e ardhshëm, pasi ai kurrë nuk ka luajtur në garën elitare të Evropës deri më tani në karrierën e tij.
Donnarumma ua kishte bërë me dije drejtuesve të Milanit se do të qëndronte vetëm nëse do të arrinte të paraqitej në Champions dhe këtë mundësi e ka sezonin e ardhshëm, pasi Milani është në zonën që siguron paraqitjen në Ligën e Kampionëve.
Milani së bashku me Atalantan kanë nga 72 pikë, kurse Juventusi është një pikë larg Napolit që mban vendin e katërt. Nëse “Rossonerët” fitojnë dy ndeshjet e ardhshme, atë kundër Torinos dhe Cagliarit, mund të kualifikohen në Champions për herë të parë që prej vitit 2013.
