-
Përktheu:
Vita Abrashi-Kajtazi
- 22 janar 2026 10:55
- Shpërndaje në:
Këngëtarja Taylor Swift do të bëhet kantautorja e dytë më e re në histori që futet në “Songwriters Hall of Fame”, duke u renditur menjëherë pas artistit, Stevie Wonder, i cili ishte vetëm 33 vjeç kur u nderua në vitin 1983.
Lajmi u konfirmua të mërkurën nga vetë organizata, ka raportuar The Guardian.
36-vjeçarja, fituese e 14 çmimeve “Grammy”, konsiderohet si një nga figurat më të rëndësishme të shkrimit të këngëve në muzikën moderne dhe ky vlerësim e vendos atë përkrah autorëve më të mëdhenj të disa brezave.
Swift do të nderohet së bashku me artistë si Alanis Morissette, Kenny Loggins, si dhe anëtarët e grupit “Kiss”, Paul Stanley dhe Gene Simmons.
Ceremonia e pranimit do të mbahet më datën 11 të muajit qershor këtë vit, në hotelin Marriott Marquis në New York, u njoftua gjatë emisionit CBS Mornings.
“Janë njerëz që kanë shkruar fjalë për fjalë kolonën zanore të jetës sonë. Këngët me të cilat kërcejmë, qajmë dhe shpërthejmë nga energjia”, tha korrespondenti i kulturës Anthony Mason në CBS Mornings, para se të shpallte emrat e të përzgjedhurve.
“Songwriters Hall of Fame” u themelua në vitin 1969 dhe ka si kriter që kantautorët të kenë një katalog të rëndësishëm këngësh dhe duhet të kenë kaluar të paktën 20 vjet nga publikimi i parë komercial i një kënge.
Swift, e njohur për hitin “Bad Blood”, ka fituar katër herë çmimin “Grammy” për albumin e vitit.
Publikimi i saj më i fundit, “The Life of a Showgirl”, ka shënuar shitjet më të larta të javës së parë në historinë moderne të muzikës, sipas Billboard, bazuar në të dhënat e kompanisë Luminate që monitoron shitjet muzikore.
Në muajin maj të vitit 2025, këngëtarja ka njoftuar se kishte blerë të drejtat e muzikës së saj, duke rimarrë zyrtarisht pronësinë e të gjitha regjistrimeve origjinale, përfshirë gjashtë albumet e para të karrierës.
Po atë vit, turneu rekord “Eras” u shndërrua në një film koncerti dhe në një seri dokumentare me gjashtë pjesë në Disney+, që pasqyron suksesin e jashtëzakonshëm të këtij turneu.
Ndërkohë, albumi i saj i vitit 2024, “The Tortured Poets Department”, ka debutuar në vendin e parë të renditjes Billboard 200 dhe ka shitur ekuivalentin e rreth 8 milionë albumeve vetëm në SHBA, sipas të dhënave të Luminate.