Arkeologu aventurier, Indiana Jones, po udhëton drejt rivierës franceze.
“Indiana Jones and the Dial of Destiny”, filmi i pestë në serinë e projekteve ikonike të Harrison Fordit, do ta shënojë premierën botërore në kuadër të Festivalit të filmit në Kanë më 18 maj. Lajmin e kanë konfirmuar organizatorët e kësaj ngjarjeje kinematografike. Me këtë rast, festivali po ashtu do ta nderojë karrierën e gjatë dhe të suksesshme të ylli të Hollywoodit, Ford.
Shfaqja e vazhdimit të ardhshëm në Kanë, regjinë e së cilit e ka bërë James Mangold, vjen 15-vjet pasi filmi i vitit 2008, “Indiana Jones and the Kingdom of the Crystal Skull”, e shënoi premierën në festivalin prestigjioz francez.
“Dial of Destiny”, konsiderohet kapitulli i fundit i filmave të suksesshëm në arkat filmike dhe në Shtetet e Bashkuara të Amerikës do të lansohet nëpër kinema më 28 qershor.
Por, kjo nuk do të jetë premiera e vetme hollywoodiane në edicionin e sivjetmë të Festivalit të Kanës, i cili fillon më 16 maj të këtij viti.
Edhe
Harrison Ford për herë të fundit në rolin e Indiana Jonesit
Të premten e kaluar u njoftua se projekti i shumëpritur i regjisorit Martin Scorsese, “Killers of the Flower Moon”, po ashtu do ta shënojë premierën botërore në këtë ngjarje. Filmi i cili vjen i adaptuar nga libri i bazuar në ngjarje të vërtetë i autorit, David Grann, dhe me skenar të shkruar nga Eric Roth, e sjell historinë e vrasjeve brutale të fisit indian “Osage”, ngjarje kjo e cila kishte ndodhur në Oklahoma gjatë viteve ‘20. Vrasjet kishin ndodhur pasi në tokat e këtij fisi ishin zbuluar depozita të mëdha të naftës. Në rolet kryesore vijnë aktorë të njohur si, Leonardo DiCaprio, Robert De Niro dhe Jesse Plemons. Premiera e përcjellë me qilim të kuq zë vend më 20 maj dhe e shënon rikthimin e parë të Scorseses në Kanë nga filmi i vitit 1986, “After Hours”.
Lista e plotë e filmave që do të shfaqen në festival sivjet do të bëhet e ditur më 13 prill.
