Kanabisi funksionon më mirë se ilaçet për gratë me endometriozë, thotë studimi

Pacientet me endometriozë thonë se kanabisi i ndihmon më mirë sesa medikamentet që i marrin me recetë të mjekut dhe ka më pak efekte anësore të pakëndshme.

Një studim i Universitetit të Western Sydney në Australi, ku morën pjesë 899 gra nga 28 vende të ndryshme që përdornin kanabis për ta trajtuar endometriozën –  sëmundje kronike që shkakton dhimbje të forta në zonën pelvike (pjesa e poshtme e trupit, midis barkut dhe kofshëve), lodhje, menstruacione të dhimbshme dhe probleme me fertilitetin.

Rreth 78% e grave që morë pjesë në studim thanë se kanabisi ishte më efektiv për simptomat e tyre sesa medikamentet që kishin përdorur më parë dhe patën më pak efekte anësore. Shumica prej tyre kanë theksuar se nuk e kanë ndërmend të ndalonin përdorimin, shkruan Female First.

Arsyet kryesore për të kaluar tek kanabisi ishin: vazhdimi i dhimbjeve me medikamentet e zakonshme dhe efektet anësore të bezdisshme të tyre. Gjysma e grave  kishin frikë se mos bëheshin të varura nga medikamentet me recetë.

Studimi u botua në revistën “Reproduction and Fertility” dhe bëri thirrje për më shumë komunikim mes mjekëve dhe pacientëve.

Hulumtuesit theksuan se mbikëqyrja mjekësore është shumë e rëndësishme për të kontrolluar efektet anësore dhe ndërveprimet si me medikamentet ashtu edhe me kanabisin, për të cilat gratë mund të mos jenë në dijeni. 

Kjo është veçanërisht e rëndësishme për endometriozën, sepse trajtimi i saj shpesh është i vështirë dhe i pamjaftueshëm, sidomos kur përdoret edhe kanabisi.

Ata kërkuan më shumë studime klinike për të testuar se sa i sigurt dhe efektiv është kanabisi, duke thënë se “duhet kërkim urgjent, përfshirë prova klinike dhe të dhëna nga përdorimi real, për ta vlerësuar sigurinë, tolerancën dhe efektivitetin e kanabisit të cilësisë së kontrolluar në pacientet me endometriozë”.