Studimi: Kanabisi mjekësor ka potencial ta trajtojë kancerin

Kanabisi mjekësor mund të luajë rol të rëndësishëm në trajtimin e simptomave të kancerit dhe madje edhe në luftimin e vetë sëmundjes, sipas një studimi të publikuar këtë javë në revistën shkencore “Frontiers in Oncology”. Ky është studimi më i madh i këtij lloji që është realizuar ndonjëherë, shkruan “The Guardian”.

Studimi, i udhëhequr nga Ryan Castle, drejtor i kërkimeve në Institutin e Onkologjisë Shëndetësore, shqyrtoi mbi 10 mijë kërkime shkencore që lidhin kanabisin me trajtimin e kancerit. Sipas Castle, qëllimi ishte të krijohej një konsensus shkencor mbi efektivitetin e kanabisit, një fushë që për vite me radhë ka qenë e ndikuar nga debatet politike dhe kufizimet ligjore, pasi kanabisi vazhdon të klasifikohet si substancë e paligjshme në nivel federal në SHBA.

“Prisnim që rezultatet të tregonin një konsensus të moderuar, ndoshta 55% në favor të efektit pozitiv të kanabisit. Por ato tejkaluan pritjet tona – rreth 75% e studimeve sugjeruan përfitime të qarta nga përdorimi i kanabisit”, ka thënë Castle.

Studimi konkludon se kanabisi mjekësor është efektiv në lehtësimin e simptomave si humbja e oreksit, dhimbja, të përzierat dhe inflamacioni. Por më tej, rezultatet treguan potencial të kanabisit për të ngadalësuar përhapjen e qelizave kancerogjene dhe për të nxitur procesin e “apoptozës” – vdekjes natyrale të këtyre qelizave.

Për analizimin e një sasie kaq të madhe të të dhënave, Castle dhe ekipi i tij përdorën inteligjencën artificiale dhe teknika të përpunimit të gjuhës natyrore, si “analiza e ndjenjave”, për të përcaktuar qëndrimet pozitive, neutrale apo negative të studimeve ndaj përdorimit të kanabisit në trajtimin e kancerit.

Megjithatë, jo të gjithë shkencëtarët janë të bindur. Onkologu i njohur Donald Abrams, profesor në Universitetin e Kalifornisë, mbetet skeptik ndaj pretendimeve se kanabisi mund të shërojë kancerin. Ai thotë se pavarësisht përfitimeve për simptomat, nuk ka prova të mjaftueshme klinike që vërtetojnë ndikimin e drejtpërdrejtë të kanabisit në zhdukjen e tumorit.

Edhe Lifestyle 17 mar 2026 Kanabisi nuk është trajtim efektiv për ankthin dhe shëndetin mendor

Nga ana tjetër, Castle thekson se përveç provave paraklinike, gjithnjë e më shumë të dhëna nga pacientët dhe studimet pilot tregojnë rezultate premtuese. Një provë e vogël tregoi se pacientët që përdornin kanabis mjekësor krahas trajtimit tradicional kishin jetëgjatësi më të madhe, ndërsa një tjetër gjeti se CBD sintetike (që gjendet në bimën e kanabisit) ndihmonte në zvogëlimin e tumorit.

Për të vërtetuar plotësisht efektin e kanabisit, studiuesit kërkojnë zhvillimin e studimeve klinike të gjera, të cilat aktualisht pengohen nga statusi ligjor i substancës në SHBA. Castle shpreson se gjetjet e këtij studimi do të nxisin autoritetet të lehtësojnë këto kufizime.

“Ne nuk po kërkojmë të ulim standardet për trajtimin e kancerit. Po themi se kanabisi i përmbush, madje shpesh i tejkalon ato – ndonjëherë më shumë sesa disa trajtime farmaceutike ekzistuese”, ka deklaruar Castle.