-
Përktheu:
Vita Abrashi-Kajtazi
- 1 shtator 2025 14:59
- Shpërndaje në:
Menaxhimi i diabetit nuk ka të bëjë vetëm me zakonet si kufizimi i konsumimit të karbohidrateve apo ushtrimet fizike. Janë disa veprime të vogla të përditshme që mund të kenë ndikim të madh. Ekspertët thonë se këto zakone të thjeshta mund të ndihmojnë për ta mbajtur sheqerin nën kontroll, ka shkruar EatingWell.
1. Hani perimet të parat
Dietologia Seema Shah rekomandon që kur uleni në tavolinë, të filloni me perime si brokoli, kungulleshka apo barishtet e gjelbra.
“Disa studime sugjerojnë se rendi i ushqimit mund të ndikojë drejtpërdrejt në nivelin e sheqerit pas vakteve”, ka thënë ajo.
Perimet dhe ushqimet e pasura me fibra ngadalësojnë zbrazjen e stomakut, duke shmangur ngritjen e shpejtë të nivelit të glukozës. Pas perimeve, hani proteinat dhe në fund karbohidratet.
2. Përtypni ushqimin ngadalë
Shumë njerëz hanë shpejt, por studimet tregojnë se kjo mund të rrisë sheqerin në gjak.
“Përtypja e mirë lejon tretje më të lehtë, liron hormonet e ngopjes dhe ndihmon në përmirësimin e reagimit të insulinës”, ka shpjeguar Shah.
3. Matni sheqerin sipas një orari
“Matni sheqerin gjithmonë në të njëjtën kohë të ditës”, ka theksuar endrokrinologia Yesika Garcia.
Kjo ndihmon të shihni më lehtë modelet dhe i jep mjekut informacion për të rregulluar terapinë. Kush nuk preferon shpimin e gishtit, mund të kërkojë monitorim të vazhdueshëm të glukozës nga mjeku.
4. Merrni frymë thellë
Stresi rrit hormonin kortizol, i cili gjithashtu rrit sheqerin në gjak. Doktoresha Kaitlin Hippley, rekomandon një teknikë të thjeshtë qetësimi.
“’Box breathing’ është metodë kur thithni ajrin për katër sekonda, mbani frymën katër sekonda, nxirrni frymën për katër sekonda dhe mbani sërish atë për katër sekonda”, ka thënë Hippley duke shtuar se kjo metode ndihmon në stabilizimin e nivelit të sheqerit në gjak.
5. Bëni shëtitje pas ushqimit
Nuk ka nevojë për orë të gjata ushtrimesh, edhe një shëtitje e shkurtër bën punë.
“Një shëtitje 20-minutëshe pas vakteve ndihmon muskujt të përthithin sheqerin nga gjaku”, ka thënë dietologia Vandana Sheth. Ajo ka thënë se nëse shëtisni në natyrë, merrni edhe përfitimin e reduktimit të stresit.
6. Kombinoni karbohidratet me proteina
“Sa herë që hani karbohidrate, si fruta apo bukë, shoqërojini me proteina”, ka këshilluar Hippley.
Ky kombinim ngadalëson shndërrimin e karbohidrateve në sheqer, ndihmon të ndiheni më të ngopur dhe përmirëson ndjeshmërinë ndaj insulinës. Shembuj: djathë i lehtë, gjalpë kikiriku natyral, ose mish i bardhë pa yndyrë.