Agjencia e Ushqimit dhe barnave në Shtetet e Bashkuara të Amerikës ka miratuar për përdorim Alettan, pajisjen robotike autonome që është e projektuar për të marrë gjak pa pasur nevojë për ndihmë të drejtpërdrejtë nga njeriu.
Sipas FDA-së, miratimi do të ndihmojë në zbutjen e mungesës së vazhdueshme dhe të madhe të flebotomistëve në SHBA.
Roboti ende kërkon mbikëqyrjen e një flebotomisti, por një specialist mund t’i mbikëqyrë deri në tri pajisje njëkohësisht, duke lehtësuar presionin gjatë marrjes së gjakut në ambientet ambulatore.
Aletta e kryen vetë të gjithë procesin e marrjes së gjakut, nga vendosja e shtrënguesit deri te vendosja e fashës.
Për të gjetur një venë të përshtatshme, Aletta përdor pamje multimodale që kombinon rrezet infra të kuqe të afërta dhe ultratingullin. Pajisja përdor gjithashtu ultratingullin doppler për të konfirmuar se ka përzgjedhur një venë dhe jo një arterie.
Në një provë kyç, pajisja tregoi një shkallë suksesi prej 94,5% në shpimin e parë, ndërsa 90% e pjesëmarrësve në studim raportuan se niveli i dhimbjes me Alettan ishte më i ulët ose i ngjashëm me atë të marrjes manuale të gjakut.
Edhe
Tetë ushqimet më të mira për të mbajtur në kontroll diabetin
Aletta është miratuar në Evropë prej dy vjetësh. Pajisja robotike prodhohet nga kompania holandeze Vitestro.
“Ky autorizim pasqyron angazhimin e FDA-së për avancimin e pajisjeve mjekësore novatore që ndihmojnë në përmbushjen e një nevoje kritike të shëndetit publik, duke ruajtur njëkohësisht sigurinë dhe efektivitetin që meritojnë pacientët”, tha Michelle Tarver, drejtoreshë e Qendrës së FDA-së për Pajisjet dhe Shëndetin Radiologjik, në një deklaratë. “Marrja e gjakut është një nga procedurat mjekësore që kryhen më shpesh në Shtetet e Bashkuara, megjithatë pacientët mund të përballen me vonesa për shkak të mungesës në rritje të flebotomistëve të trajnuar”.
