Opozita vlerëson se Basha shkeli Kushtetutën dhe Rregulloren

Pas përmbylljes së seancës, përfaqësues të PDK-së dhe LDK-së e kanë cilësuar konstituimin e Kuvendit nga kryetari Dimal Basha, si kundërkushtetues dhe pjesë të lojës politike të kryetarit të LVV-së, Albin Kurti. Në LVV e kanë kualifikuar kushtetues vendimin dhe kanë thënë që me rëndësi ka qenë të mos lejohet që Lista Serbe ta bllokojë procesin. E kritika për pengim të qëllimshëm të procesit të zgjedhjes së nënkryetarit i kanë adresuar opozitës

Partitë që mandatin e shkuar kanë qenë në opozitë e kanë vlerësuar kundërkushtetues konstituimin e Kuvendit dhe përmbylljen e seancës nga kryetari Dimal Basha.

Kryetari i PDK-së, Memli Krasniqi, u shpreh se nuk mund të ketë konstituim pa u kompletuar kryesia e Kuvendit dhe tha se kjo situatë është pjesë e lojës së kryetarit të LVV-së, Albin Kurti, për ta vazhduar krizën në mungesë të numrave për Qeverinë.

“... është thjesht vazhdim i lojës politike të Albin Kurtit, thellimi i krizës politike në të cilën jemi, vazhdimi i hezitimit të tij për të hyrë në afate kushtetuese sepse s’i ka numrat për t’u bërë kryeministër dhe po dëshiron të vazhdojë uzurpimin e Zyrës së Kryeministrit në mënyrë të paligjshme siç është duke bërë tash e sa kohë”, ka thënë Krasniqi.

E kryetari i LDK-së, Lumir Abdixhiku, krahas LVV-së ka kritikuar edhe dy partitë e tjera shqiptare, që sipas tij, ndihmuan që Kuvendi ta ketë një udhëheqës që e shkel Kushtetutën.

“Në këtë pikë shihet edhe naiviteti i partive të tjera, të cilat jo vetëm që po e mbajnë Kuvendin të bllokuar, por edhe na lënë me një kryetar Kuvendi si Dimal Basha, i cili sot jo vetëm që vazhdoi me shkelje të Kushtetutës, por edhe me pretendimin se Kuvendi është konstituuar, pa interpretuar qartë Kushtetutën e Kosovës”, ka thënë Abdixhiku.

Në LVV e kanë vlerësuar kushtetuese mënyrën e përmbylljes së seancës, teksa patën kritika për ish-bllokun opozitar.

“Ne jemi të interesuar që ta bëjmë Qeverinë dhe institucionet e vendit ta vazhdojnë punën. Pra të konstituohet Kuvendi dhe të ecim tutje me Qeverinë. Janë ata që në vazhdimësi, duke gjetur pretekste të ndryshme në kundërthënie me atë që kanë vepruar edhe vetë kanë bllokuar dhe janë munduar ta pengojnë edhe përmbylljen e konstituimit të Kuvendit”, ka thënë deputeti i kësaj partie, Hekuran Murati.

Kundërpërgjigje ndaj këtyre akuzave ka dhënë deputetja e LDK-së, Hykmete Bajrami.

“Është hipokrizi me dalë para mediave dy eksponentë të Lëvizjes Vetëvendosje dhe të apostrofojnë parti të tjera që kinse ne jemi me Listën Serbe ndërkohë që janë përgjimet e Mimoza Kusarit, duke qenë shefe e 58 deputetëve me Listën Serbe dhe me Milan Radojqiqin”, ka thënë Bajrami.

Pas situatës së re politike, nënkryetarja e Kuvendit, Albulena Haxhiu ka vlerësuar se janë dy alternativa, ose krijimi i Qeverisë nga Vetëvendosje ose zgjedhjet e reja.

“Ne nuk guxojmë që të mbesim peng i atyre që e mohojnë ekzistencën tonë si shtet. Pra është jashtëzakonisht e rëndësishme që ne të ecim përpara me kryesinë aktuale pra përveç kryetarit të Kuvendit me nënkryetarët e zgjedhur të Kuvendit të Kosovës pra ne jemi të interesuar që të ecim përpara ose me qeverinë e re ose me zgjedhje sepse nuk kemi asnjë alternativë tjetër”, ka deklaruar Haxhiu.

Sa i përket votave për ta bërë Qeverinë, në Vetëvendosje kanë thënë se kjo do të shihet në seancën kur do të votohet mandatari dhe kabineti qeveritar.