-
Nga:
Ardit Kika
- 24 nëntor 2025 19:19
- Shpërndaje në:
Kriza buxhetore në Prishtinë ka nxitur valë të re akuzash mes Vetëvendosjes dhe LDK-së. Secila parti fajëson tjetrën për bllokimin e mjeteve financiare të kryeqytetit.
Përfaqësues të Lëvizjes Vetëvendosje fajësuan kryetarin e Prishtinës, Përparim Rama, e ata të Lidhjes Demokratike kryeministrin në detyrë, Albin Kurti, për krizën buxhetore me të cilën përballet kryeqyteti.
Ish-shefi i asamblistëve të Vetëvendosjes, Gëzim Sveçla, se Komuna e Prishtinës i ka kaluar të gjitha afatet administrative dhe ligjore për ta miratuar buxhetin dhe se buxheti i Kosovës është miratuar në Kuvend pa e përfshirë atë të Prishtinës.
Narracioni i ngritur për bllokadë, nuk është fare i vërtetë dhe duhet thënë se të vetmit bllokues të buxhetit të Prishtinës janë Përparim Rama, Lidhja Demokratike dhe lideri i saj Lumir Abdixhiku. Ne kemi qenë të qartë që nga fillimi, partitë opozitare, Lidhja Demokratike e Kosovës dhe Partia Demokratike e Kosovës nuk kanë dashur ta miratojnë buxhetin e Prishtinës.
E asamblisti i Vetëvendosjes, Egzon Azemi, tha se LDK-ja me PDK-në i kanë futur ndërmarrjet në borxhe dhe tani përballen me krizën për buxhetin.
“Komplet ndërmarrjet publike që menaxhohen nga PDK dhe LDK janë buzë falimentimit. E vetmja ndërmarrje që menaxhohet nga Lëvizja Vetëvendosje as nuk ka problem me paga, as nuk ka problem me buxhet e as nuk ka borxhe”, ka thënë Azemi.
E kryetari i LDK-së, Lumir Abdixhiku, e ka akuzuar Vetëvendosjen për hakmarrje politike ndaj qytetarëve.
Prishtina nuk i kërkon paratë e Qeverisë, prandaj nuk i duhet asnjë votim në Kuvend. Prishtina i kërkon paratë e veta; plot 35 milionë euro taksa komunale e grant, që i janë plaçkitur nga bllokuesit për hakmarrje të pastër politike. Prishtina nuk i kërkon as paratë e vitit 2026, por të këtij viti që ka tashmë buxhet; jemi ende në vitin 2025.
Shkaku i vonesave në vendimmarrje nga kuvendet komunale, buxheti i Prishtinës, ai i Gjilanit dhe buxheti i Zubin-Potokut nuk janë përfshirë në buxhetin e Kosovës të 2025-s. Kjo nuk u bë as pas miratimit të tyre nëpër komuna, meqë thuajse gjatë gjithë vitit Kosova ka funksionuar pa Kuvend, shkaku i ngërçit politik të krijuar pas zgjedhjeve nacionale të shkurtit.