Kosova pranon ftesën e Trumpit për t’u bërë pjesë e Bordit të Paqes

Zhvillim të rëndësisë historike për Kosovën, e ka vlerësuar presidentja Vjosa Osmani, ftesën e presidentit të SHBA-së, Donald Trump, për t’u bërë pjesë e Bordit të Paqes. Pjesëmarrja e Kosovës në këtë mekanizëm është mirëpritur nga kryeministri i Shqipërisë, Edi Rama, e kryetari i AAK-së, Ramush Haradinaj

Kosova ka pranuar ftesën e presidentit të Shteteve të Bashkuara të Amerikës, Donald Trump, për t’u bërë pjesë e Bordit të Paqes për Gazën. Ftesa është publikuar nga presidentja Vjosa Osmani, e cila e ka vlerësuar si zhvillim të rëndësisë historike për Kosovën. 

Bordi i Paqes është mekanizëm i themeluar nga presidenti amerikan, si pjesë e planit të tij për mobilizimin e burimeve ndërkombëtare për paqenë dhe zhvillimin në Gazë. 

“Në radhë të parë për shkak se kjo është një organizatë ndërkombëtare, pra është anëtarësim i Kosovës në një organizatë ndërkombëtare dhe atë si një ndër anëtarët themelues të kësaj organizate. Në radhë të dytë për shkak se kjo organizatë themelohet nga SHBA-ja, aleati ynë strategjik. Dhe në radhë të tretë për shkak se SHBA-ja ka përzgjedhur pikërisht Kosovën në mesin e disa shteteve që janë anëtare themeluese, duke pasur parasysh përvojën e Kosovës në shtetndërtim, në ndërtim të paqes, aleancave, përvojë kjo që do të mund të ndihmojë në ndërtimin e paqes edhe në vendet e tjera të botës”, ka deklaruar Osmani, në një prononcim për media, pas pjesëmarrjes në Akademinë përkujtimore për ish-presidentin Ibrahim Rugova.

Sipas Osmanit, në ftesën për pjesëmarrje në këtë bord nuk është përmendur ndonjë pagesë e nevojshme. 

“Një gjë e tillë nuk është përmendur në dokumentacionin që na është dërguar. Ju e keni parë edhe vetë ftesën, por edhe në dokumentacionin përcjellës nuk përmendet çështja e ndonjë pagese. I lihet shteteve që këtë gjë ta bëjnë në mënyrë vullnetare”, ka thënë ajo. 

Pjesëmarrja e Kosovës është mirëpritur nga kryeministri i Shqipërisë, Edi Rama, i cili po ashtu i është përgjigjur pozitivisht ftesës së presidentit Trump. Ai ka thënë se ftesa forcon marrëdhëniet e Amerikës me popullin shqiptar dhe jep një sinjal domethënës për sigurinë e përkatësinë e Kosovës në hapësirën e interesit të gjerë amerikan në botë.  

“Edhe njëherë urime dhe dua të besoj se faktorët politikë të Kosovës, do ta çmojnë këtë dorë të shtrirë nga presidenti i SHBA-së, si një gjest që nuk është aspak pa lidhje edhe me respektin për ty personalisht e për rolin tënd ndërkombëtarisht”, ka shkruar Rama në Twitter.

Edhe Arbëri 18 shk 2026 Osmani udhëton në SHBA, merr pjesë në takimin inaugurues të Bordit të Paqes

Kryetari i AAK-së, Ramush Haradinaj, ka thënë se pjesëmarrja e Kosovës në Bordin e Paqes përforcon rolin e saj si faktor konstruktiv të paqes në stabilitetin rajonal dhe global. 

“Pjesëmarrja e Kosovës dhe e Shqipërisë në Bordin e Paqes, si pjesëtare të një strukture ku marrin pjesë liderët e botës demokratike në përpjekje për ndërtimin dhe ruajtjen e paqes, nën udhëheqjen e Shteteve të Bashkuara dhe presidentit Trump, është një dritare shprese për ne... Rikthimi i Kosovës si një partner i besueshëm dhe serioz i Shteteve të Bashkuara është jetik jo vetëm për garantimin e sigurisë kombëtare, por edhe për avancimin e interesave tona shtetërore, përfshirë integrimin euroatlantik, zhvillimin ekonomik dhe forcimin e pozitës ndërkombëtare të vendit”. 

Por, Kosovës në Bordin e Paqes nuk do t`iu bashkohen shtetet si Franca, Norvegjia e Suedia. Edhe pse përkrahin planin për paqe në Gazë, ato kanë shprehur shqetësimi se ky institucion synon të zëvendësojë Kombet e Bashkuara si vendtakimin kryesor për zgjidhjen e konflikteve.  Pjesë e Bordit të themeluar nga Trump nuk do të jetë as Italia, pasi konsiderohet se bashkimi me një grup të tillë të udhëhequr nga udhëheqësi i një vendi të vetëm do të shkelte kushtetutën. Argjentina, Armenia, Azerbajxhani, Bjellorusia, Egjipti, Hungaria, Kazakistan, Pakistani, Emiratet e Bashkuara Arabe e Vietnami, janë në mesin e shteteve të cilat kanë konfirmuar pjesëmarrjen në këtë mekanizëm.