Bastisen pronat e Radoiçiqit në veri

Tri ditë pasi institucionet e rendit identifikuan Milan Radoiçiqin si prijës të grupit paraushtarak që sulmoi policinë në Banjskë, një aksion bastisjeje është kryer në veri. Kontrolle janë zhvilluar në pronat e tij në disa lokacione, ndërkaq janë sekuestruar disa automjete, një barkë, pllaka antiplumb, rreth 5 kilogramë argjend dhe një numër pajisjesh elektronike.

Policia ka bastisur më mëngjes pronat e Milan Radoiçiqit, të dyshuarit për udhëheqjen e sulmit terrorist në Banjskë të Zveçanit.

Aksioni i Policisë së Kosovës i shtrirë në pesë lokacione të ndryshme në tri komuna në veri, nisi rreth orës 6:00 e u përmbyll para mesditës.

Vila e Radoiçiqit buzë Liqenit të Ujmanit, është në mesin e pronave të kontrolluara.

Pamjet nga aksioni që u publikuan nga ministri i Punëve të Brendshme, Xhelal Sveçla, tregojnë se përveç qasjes direkte në liqen, vila është pjesë e një kompleksi me disa objekte përcjellëse, me pishinë e me fushë tenisi.

Sveçla krahasoi Radoiçiqin me udhëheqësin kolumbian të drogës, Pablo Escobar.

“Ne e kemi dëshmuar edhe me pamje dhe me prova të tjera që udhëheqësi i këtij grupi ishte Milan Radojciq. Edhe nga pamjet që po shihen, dëshmohet se nuk bëhet fjalë për asnjë “luftëtar lirie”, por për një Pablo Escobar të rajonit. Nën maskën e mbrojtësit të qytetarëve ai dhe bashkëpunëtorët e tij u bënë multimilionerë në kurriz të ligjit, shtetit dhe qytetarëve të tjerë. Prandaj, është e domosdoshme që vatra e krimit e gjithë këtyre viteve në veri të vendit të hetohet së bashku me të gjithë asetet, aparaturën dhe lokacionet e grupit terrorist”, ka shkruar Sveçla në Facebook.

Pak orë nga bastisja, policia nuk shihet te vila. Në hyrje të saj, qëndron një person që kujdesej për pronën e Radojçiqit.

Aksioni i policisë përfshiu edhe dy lokacione në Mitrovicën e Veriut, një lokal dhe objekti i lavanderisë dhe kalldajave në Spitalin Rajonal në Mitrovicës së Veriut. Sipas drejtorit të spitalit, Zlatan Ellek, nga bastisja nuk është gjetur asgjë.

Rezultatet e aksionit u listuan në një njoftim të përbashkët të Prokurorisë Speciale dhe Policisë. Në të është treguar se janë bastisur edhe pronat e Vladimir Radojeviqit, i dyshuar tjetër për sulmin ndaj Policisë në Banjskë të Zveçanit.

“Pas realizimit të urdhër-kontrollit në pronat e të dyshuarve, janë sekuestruar në cilësi të provave materiale: 2 automjete mercedes, argjend 4.84 kg, 2 motorë 4X4, 1 barkë-anije, 7 DVR, 2 pllaka antiplumb me dy mbrojtës, 3 thika, 2 rutera, 2 çelësa të veturave, 5 gëzhoja, 1 dron, 5 USB, 1 kamera GoPro- SSD, 1 video kamerë me kartelë, 1 shënjestër optike, 1 spray dhe 7 telefona celularë”, thuhet në njoftimin e Prokurorisë Speciale.

Radojçiqi është një nga të dyshuarit e identifikuar për sulmin e së dielës në Banjskë, nga i cili mbeti i vrarë polici Afrim Bunjaku.