Iniciohen raste të keqtrajtimit të fëmijëve në Prishtinë, Prizren e Mitrovicë

Tri raste të ndara për keqtrajtim të fëmijëve janë iniciuar në 24 orët e fundit në Prishtinë, Prizren e Mitrovicë.

Policia në raportin 24-orësh, të martën, ka bërë të ditur se në Prishtinë është arrestuar një grua pasi ka dalë bashkë me fëmijën e saj të kërkojë lëmoshë. Lidhur me rastin është konsultuar prokurori i shtetit, i cili ka rekomanduar që pas intervistimit e dyshuara të lirohet në procedurë të rregullt.

Në Prizren, një i mitur derisa ka qenë në vuajte të dënimit, e ka denoncuar nënën e tij se e ka braktisur. Sipas Policisë, ai ka deklaruar se si pasojë e braktisjes, ka devijuar dhe është marrë me vjedhje për çka edhe është duke vuajtur dënimin. Rasti njoftohet se është duke u hetuar.

Ndërkaq në sheshin “Mehë Uka” në Mitrovicë janë hasur katër fëmijë duke kërkuar lëmoshë. Më pas njoftohet se janë identifikuar edhe prindërit ku është arrestuar nëna e tyre, nën dyshimin se i ka keqpërdorur fëmijët. Lidhur me rastin është konsultuar prokurori i shtetit, i cili ka rekomanduar që pas intervistimit e dyshuara të lirohet dhe rasti të shkojë në procedurë të rregullt.