Një automjet është grabitur mëngjesin e së premtes në dalje të autostradës në fshatin Duhël. Automjeti funksiononte si postë private.
Viktima ka raportuar se ai është ndaluar dhe sulmuar nga persona të panjohur.
“Të dyshuarit, nën kërcënim dhe me forcë, i kanë marrë disa zarfa të mbyllur që dyshohet se përmbanin para. Viktima nuk ka lëndime dhe nuk e di shumën e saktë të parave të grabitura, pasi zarfat kanë qenë të mbyllura. Policia ka reaguar menjëherë dhe është duke u marrë intensivisht me rastin”, ka njoftuar Policia.
Deri më tani dyshohet se ishin disa persona dhe ishin të armatosur, e se ata janë larguar nga vendi i ngjarjes me një automjet të tipit Golf.
Hetimet janë në zhvillim me qëllim të identifikimit dhe arrestimit të të dyshuarve.