Dënohet zyrtari korrektues dhe i paraburgosuri për posedim të kokainës e marihuanës

Gjykata Themelore në Gjilan ka dënuar zyrtarin e Qendrës së Paraburgimit në Novobërdë, K.R., dhe të paraburgosurin S.L., për shkak të substancave narkotike.

Zyrtari është dënuar me 500 euro gjobë dhe burgim prej një viti si dhe dënim plotësues: ndalimi i ushtrimit të profesionit, veprimtarisë ose detyrës, në kohëzgjatje prej një viti, pas mbajtjes së dënimit me burgim, thuhet në njoftimin e gjykatës.

Kurse, i paraburgosur është gjobitur me 500 euro dhe burgim prej tre muajsh.

“I akuzuari K. R. me datë 01.11.2022, rreth orës 14:30 minuta, në Qendrën Paraburgimit në Komunën e Novobërdës, në cilësinë e personit zyrtar – zyrtar korrektues, pa autorizim shpërndanë apo dorëzon substanca apo preparate të cilat janë shpallur me ligj si narkotikë, substanca psikotrope ose substanca analoge, në atë mënyrë që derisa ishte në orarin e punës si zyrtarë korrektues, shkon në katin P-2, dhomën nr. 7 dhe komunikon me të paraburgosurin S. L., ku përmes vrimës se vrojtimit, e ka nxjerrë nga xhepi i pantallonave të uniformës zyrtare sasinë e substancës narkotike të llojit kokainë dhe marihuanë dhe ja jep në dorë të paraburgosurit dhe më pas intervenojnë pjesëtarët e tjerë të shërbimit korrektues dhe në dhomën e tij gjejnë: një qese plasmani me kokainë në peshë prej 2.57 gram dhe një qese plasmani me marihuanë në peshë prej 7.46 gram”, thuhet në njoftim.

Ndërsa, i pandehuri S. L., pa autorizim ka poseduar substancë narkotike, substancë psikotrope apo analoge, në atë mënyrë që, pas intervenimit të zyrtarëve korrektues në katin P-2, në dhomën nr.7, në dhomën e tij gjejnë: një qese plasmani me kokainë në peshë prej 2.57 gram, dhe një qese plasmani me marihuanë në peshë prej 7.46 gram.