Arrestohen 5 persona për trafikim me armë në Prishtinë e në jug të Mitrovicës

Me urdhër të Prokurorisë Speciale, Policia e Kosovës i ka arrestuar pesë persona, me dyshimin se kanë qenë të përfshirë në trafikim armësh.

Të arrestuarve S.S., S.S., E.XH., SH.D. de SH.J., iu bastisën shtëpitë dhe pronat, e në cilësi të provave janë sekuestruar 20 kallashnikovë, 20 karikatorë, 2 automjete, 6 telefona dhe dokumente relevante.

Sipas autoriteteve, operacionet janë kryer në rajonin e Mitrovicës Jugore dhe në Prishtinë, në 5 lokacione të ndryshme, ndersa të arrestuarve u është shqiptuar masa e ndalimit për 48 orë.

“Policia e Kosovës dhe Prokuroria e Shtetit mbeten të përkushtuara në realizimin e detyrave dhe autorizimeve ligjore në interes të ruajtjes së rendit dhe sigurisë publike, parandalimit të veprimtarive të ndryshme kriminale dhe sjelljen para drejtësisë të personave të dyshuar”, thuhet në njoftim.