Përzgjedhësi i Shqipërisë, Sylvinho, e ka mbrojtur vendimin për të mos ftuar emra të rinj në Kombëtare për ndeshjet e shtatorit. Kuqezinjtë luajnë fillimisht miqësore me Gjibraltarin më 4 shtator, ndërsa më 9 shtator e kanë ndeshjen kualifikuese ndaj Letonisë, në Tiranë.
Braziliani të premten e shpalli listën në të cilin nuk kishte asnjë emër të ri. Ai ndërkohë mbajti konferencë për shtyp dhe tregoi pse ka vendosur për lojtarë të konfirmuar tashmë.
“Për sa i përket ndryshimeve në listë, një grup ndryshon kur një lojtar nuk ka se çfarë jep më në Kombëtare dhe kur e kam bindjen që është ashtu. Ndryshe, nuk ka pse të ndryshojë asgjë në grup, unë kam besim tek të gjithë lojtarët. Nëse marr një shenjë që një lojtar nuk do të stërvitet, atëherë do të jetë jashtë. Unë kam vënë re që të gjithë kanë shumë dëshirë dhe krenari që të vijnë të luajnë me Kombëtaren. Nuk është momenti për të eksperimentuar, sepse kemi ndeshje të fortë përpara. Kemi bërë eksperimente gjatë këtyre dy vjetëve, por tani nuk është momenti, fokusi është për ta fituar ndeshjen”, ka thënë Sylvinho.
Shqipërisë i duhet fitorja ndaj Letonisë për të mbetur në garë për kualifikim në Botëror. Shqipëria në dy ndeshjet e shtatorit do të jetë pa Ardian Ismajlin.
“Ne kemi bërë rreth 50% të rrugëtimit. Kemi luajtur katër ndeshje dhe na kanë mbetur edhe katër ndeshje të tjera për t’i luajtur. Është një ndeshje shumë e rëndësishme që e luajmë në shtëpi, do të përgatitemi mirë. Për sa i përket lojtarëve që mungojnë, fola me Ismajlin, i cili tashmë ka ndërruar klub dhe është transferuar te Torino. Ka një dëmtim të lehtë dhe duhet të jetë i qetë për të qenë në 100% e tij. Si çdo transferim i ri, edhe atij i duhet pak kohë për t’u përshtatur me ambientin e ri dhe klubin”, ka thënë selektori Sylvinho.
Braziliani ka theksuar se janë edhe rreth 20 lojtarë të tjerë që i përcjellin. 4-5 prej tyre, sipas Sylvinhos, janë shumë të mirë dhe ftesën do ta marrin në kohën e duhur.
Për ndeshjen me Letoninë, selektori i kuqezinjve ka thënë se do të jetë e vështirë.
Sylvinho ka besim te Nedim Bajrami e Ernest Muçi, ndonëse të dy kanë telashe në klubet e tyre.
“Për sa i përket zgjedhjeve, eksperienca të mëson që një ndeshje si kjo është shumë e rëndësishme. Të sjellësh lojtarë të rinj, ndoshta nuk është momenti i duhur. Duhet të fokusohemi te lojtarët që janë mësuar me stilin e lojës, që marrin përgjegjësi. Ndoshta nuk është momenti i një djaloshi 20-vjeçar, që sigurisht mund të jetë shumë i mirë, por na duhen lojtarë që janë mësuar me skemat tona dhe përgjegjësinë që duhet ta marrin. Sigurisht, do të vijë edhe momenti i tyre. Kam folur shumë me stafin, ishte e vështirë, por kemi besim që lojtarët që i kemi përzgjedhur do na përgjigjen në fushë”, ka thënë Sylvinho.
Ndeshja vendimtare e Shqipërisë vlerësohet ajo ndaj Serbisë, që zhvillohet më 11 tetor në Beograd. Por ajo do të mbetet e rëndësishme vetëm me fitore ndaj Letonisë. Në nëntor, Kombëtarja luan me Andorrën në udhëtim dhe me Anglinë në shtëpi, në mbyllje të kualifikimeve.