Mbrojtësi Ardian Limani ka thënë se Prishtina ka skuadër kualitative për t’u kthyer me rezultat pozitiv në Kosovë. Ai pranon se Prishtinën e pret punë e vështirë ndaj Sheriff Tiraspolit.
Ndeshja e parë mes Sheriffit dhe Prishtinës zhvillohet në “Sheriff Arena” në Tiraspol të Moldavisë, të enjten nga ora 19:00. Ndeshja e kthimit është më 17 korrik në “Fadil Vokrri” në Prishtinë.
“Presim ndeshje të fortë nesër, sepse dihet që Sheriff Tiraspoli është ekip me histori dhe shumë i fortë, por ne ka një muaj që jemi duke u përgatitur për këtë ndeshje. Kemi kualitet për të marrë rezultat pozitiv për t’u kthyer më të qetë në Kosovë për ndeshjen e kthimit”, ka thënë Limani për faqen e klubit.
Prishtina kthehet pas katër vjetësh në gara evropiane. Së fundi, në gara evropiane Prishtina u paraqit në edicionin 2021/2022.
Prishtina është fituese e Kupës së Kosovës, kurse Sheriffi është nënkampion dhe fitues në fuqi i Kupës së Moldavisë.
