Portugezi Francisco Conceicao është vlerësuar rival i Edon Zhegrovës për vend në formacionin startues të Juventusit. Për shkak të gjendjes fizike, Conceicao nuk është grumbulluar në dy ndeshjet e fundit të Juves. Por Edon Zhegrova sërish mbeti në stol.
Juve fitoi 3:0 ndaj Sassuolos më 6 janar dhe 5:0 ndaj Cremoneses të hënën mbrëma.
Ndaj Sassuolos, Zhegrova luajti vetëm prej minutës së 90-të. E zëvendësoi italianin Fabio Miretti.
Ndaj Cremoneses, futbollisti kosovar luajti prej minutës së 62-të. Dhe e zëvendësoi Kenan Yildizin. Ndërkohë Miretti luajti deri në minutën e 83-të dhe ishte prej më të mirëve.
Pikërisht Miretti “e fitoi” pozitën që e shpreson Zhegrova, në mungesë të Conceicaot. Dhe Zhegrova vazhdon të jetë vetëm zëvendësues. Ndaj Cremoneses e fitoi rastin kur fituesi tashmë dihej. Rezultati ishte 4:0. Dhe nuk u vlerësua me ndonjë notë të mirë.
Ndërkohë Juventusi vazhdon të rritet si skuadër, përkatësisht të ketë rezultate gjithnjë e më të mira. Humbjen e fundit e ka pësuar më 7 dhjetor, 2:1 nga Napoli. Prej atëherë në Serie A ka fituar ndaj Bolognas, ndaj Romës e ndaj Pisas, ka barazuar me Leccen dhe ka fituar ndaj Sassuolos dhe Cremoneses. Tani skuadra e Luciano Spallettit është në vendin e katërt në kampionatin italian me 39 pikë, sa i ka Napoli në vendin e tretë. Milani është i dyti me 40 pikë, kurse Interi i pari me 43. Roma po ashtu i ka 39 pikë në vendin e pestë dhe gjitha këto skuadra janë në garë për titull.
“Djemtë e Spalletit dërguan porosi të qartë dhe të zëshme për ligën. Një ekip në rritje, më shumë vetëbesim dhe paraqitje dominante. E gjitha në balancë të përkryer”, ka shkruar “Tuttosport”, mediumi i afërt me Juven.
Pikërisht balanci mes lojës në sulm dhe mbrojtje vlerësohet se i mungon më së shumti Zhegrovës. Derisa në sulm shpesh ofron magji, në mbrojtje shpesh është pikë e ndjeshme e skuadrës. Këtë e ka thënë edhe Spalletti.
Ky medium e ka vlerësuar Mirettin me notën 7.5. Ka vlerësuar paraqitjen e italianit 22-vjeçar, ndërsa ka shkruar se ai mori duartrokitje nga tifozët në stadium.
Zhegrova u vlerësua me notën 6. Sipas “Tuttosport”, rrjedha e lojës i “mundësoi Zhegrovës të argëtonte veten dhe tifozërinë me disa lëvizje akrobatike, më shumë se zakonisht”.
Zhegrova tashmë i ka nëntë paraqitje në Serie A. Por ende nuk ka gol e asistim. Ka pasur momente shumë të mira. Ndeshje po ashtu. Por vendin e titullarit nuk po e fiton dot. Ai e ka për Juven edhe një ndeshje në Kupë të Italisë dhe katër të tjera në Champions.
Në serinë e fitoreve, vështirë se Spalletti mund të vendosë për ndryshim në formacion.
“Mendoj se jemi paraqitur mirë në fushë. Kemi luajtur ndeshje të mirë, me dëshirën e duhur ndaj një kundërshtari që e di se çka duhet të bëjë, që e njeh këtë ligë mirë dhe është ekip i organizuar. Me pak fat në golin e parë, loja shkoi në drejtimin e duhur”, ka thënë Spalletti.