-
Përktheu:
Flutura Gashi-Mehmeti
- 4 janar 2026 11:16
- Shpërndaje në:
Presidenti ukrainas, Volodymyr Zelensky, ka deklaruar se shpreson për një samit udhëheqësish në SHBA deri në fund të janarit për të diskutuar propozimet se si t'i jepet fund luftës me Rusinë.
Duke folur në një konferencë për shtyp të shtunën në mbrëmje, Zelensky ka thënë se nëse diplomacia për t'i dhënë fund luftës dështon, vendi i tij do të vazhdojë të mbrohet.
"Nëse Rusia i bllokon të gjitha këto dhe siç thashë, varet nga partnerët tanë - nëse partnerët tanë nuk e detyrojnë Rusinë të ndalojë luftën, do të ketë një rrugë tjetër: të mbrohemi", ka thënë ai.
Këshilltarët e sigurisë nga aleatët kryesorë të Ukrainës u takuan në Kiev të shtunën për bisedime mbi planin e ndërmjetësuar nga SHBA-ja për t'i dhënë fund luftës, disa ditë pasi Kievi njoftoi se një marrëveshje ishte "90%" gati.
Zyrtarë nga 15 vende, përfshirë Mbretërinë e Bashkuar, Francën dhe Gjermaninë, si dhe përfaqësues nga NATO-ja dhe BE-ja i janë bashkuar takimit.
I dërguari special i SHBA-së, Steve Witkoff, gjithashtu u është bashkuar virtualisht, ka thënë një zyrtar ukrainas, megjithëse sulmi ushtarak amerikan ndaj Venezuelës i ka lënë në hije procedurat.
Javën tjetër, bisedimet do të vazhdojnë gjatë një takimi të udhëheqësve evropianë në Paris dhe më pas me negociatorët amerikanë.
"Dhe pas kësaj. ne do të përgatitemi për një takim në Shtetet e Bashkuara në nivel udhëheqësish. Ne do të donim që e gjithë kjo të ndodhte në janar, deri në fund të janarit", ka thënë Zelensky
Përpjekjet diplomatike për t'i dhënë fund luftës janë shtuar në javët e fundit, megjithëse si Moska ashtu edhe Kievi mbeten në mosmarrëveshje mbi çështjen kryesore të territorit.
Rusia, e cila pushton rreth 20% të Ukrainës, po shtyn për kontroll të plotë të rajonit lindor të Donbasit të vendit si pjesë e një marrëveshjeje.
Por Kievi ka paralajmëruar se lëshimi i tokës do ta inkurajojë Moskën dhe ka shtuar se nuk do të nënshkruajë një marrëveshje paqeje që nuk arrin ta pengojë Rusinë të pushtojë përsëri.