Zelensky: Situata në Donbas është jashtëzakonisht e vështirë

Në orët e fundit, presidenti ukrainas, Volodymyr Zelensky e ka quajtur situatën në rajonin lindor të Donbasit “jashtëzakonisht të vështirë” dhe argumentoi se furnizimi i rregullt me armë në Ukrainë ishte strategjia më e mirë për të ruajtur stabilitetin global.

Zelensky tha se “forca e plotë e ushtrisë ruse u hodh për të sulmuar Donbasin. Në Lyman, Popasna, Severodonetsk, Slovyansk, pushtuesit duan të shkatërrojnë gjithçka, shkruan BBC të mërkurën.

"Prandaj, furnizimi me armë të rënda në Ukrainë - MLRS, tanke, anti-anije dhe armë të tjera, është investimi më i mirë në ruajtjen e stabilitetit në botë dhe parandalimin e shumë krizave të rënda që Rusia ende po planifikon ose i ka provokuar tashmë”, shtoi ai.

Komentet e Zelenskyt vijnë pasi zyrtarët ukrainas të mbrojtjes paralajmërojnë se lufta e Rusisë në Ukrainën lindore tani është në fazat e saj më intensive dhe mund të përcaktojë potencialisht fatin e vendit.