-
Përktheu:
Flutura Gashi-Mehmeti
- 26 qershor 2025 12:03
- Shpërndaje në:
Presidenti i Ukrainës, Volodymyr Zelensky, ka miratuar zyrtarisht të mërkurën planet për të ngritur një gjykatë të re ndërkombëtare për të ndjekur penalisht zyrtarët e lartë rusë për pushtimin në shkallë të plotë të Ukrainës.
Tribunali special do të krijohet nëpërmjet një marrëveshjeje midis Ukrainës dhe Këshillit të Evropës, organit më të lartë të të drejtave të njeriut në kontinent, raporton AP.
Zelensky po viziton organizatën me seli në Strasburg për herë të parë si pjesë e njoftimit.
Tribunali special synon të shënjestrojë udhëheqësit e lartë rusë për "krim të agresionit", i cili qëndron në themel të krimeve të panumërta të luftës për të cilat Ukraina akuzon forcat ruse se i kanë kryer që nga fillimi i luftës në vitin 2022.
Gjykatat ndërkombëtare ekzistuese, përfshirë Gjykatën Ndërkombëtare Penale në Hagë, nuk kanë juridiksion për të ndjekur penalisht shtetasit rusë për atë vepër specifike penale.
Që nga fillimi i konfliktit, Kievi ka kërkuar krijimin e një gjykate speciale që shkon përtej ndjekjes penale të krimeve të luftës që Ukraina pretendon se forcat ruse kanë kryer - duke përfshirë bombardimin e infrastrukturës civile, vrasjen e civilëve, përdhunimin, marrjen e pengjeve dhe torturën. Rusia i mohon këto pretendime.
Ka ende detaje logjistike për t'u zgjidhur, duke përfshirë se ku do të vendoset gjykata. Haga është sugjeruar për shkak të infrastrukturës së saj ekzistuese ligjore, por nuk është marrë ende një vendim përfundimtar.
Rusia nuk i ekstradon qytetarët e saj dhe nëse presidenti Vladimir Putin do të përfundojë ndonjëherë në bankën e të akuzuarve mbetet për t'u parë.
Sipas të drejtës ndërkombëtare, krerët në detyrë dhe disa zyrtarë të tjerë të lartë, shpesh të referuar si "trojka", duke përfshirë kreun e shtetit të një vendi, kreun e qeverisë dhe ministrin e Jashtëm, gëzojnë imunitet nga ndjekja penale. Kjo do të thotë që çdo padi e mundshme ndaj Putinit mund të ecë përpara vetëm nëse ai largohet nga detyra.
Institucioni do të financohet nga vendet mbështetëse të njohura si Grupi Bazë, duke përfshirë Holandën, Japoninë dhe Kanadanë. Shtetet e Bashkuara mbështetën projektin nën ish-presidentin Joe Biden, por administrata e presidentit Donald Trump nuk e ka mbështetur atë.
