Zelensky: Mbështetja amerikane është shumë e rëndësishme për Ukrainën

Presidenti ukrainas, Volodymyr Zelensky, është pyetur nga gazetarët lidhur me ndërprerjen e dërgimit të ndihmës amerikane për Ukrainën, teksa ka deklaruar se vendi i tij mbështetet fuqishëm në Shtetet e Bashkuara të Amerikës, ka raportuar The Guardian.

“Ne mbështetemi në vazhdimësinë e ndihmave amerikane, [dhe] ka disa gjëra që Evropa... nuk i ka”, ka thënë ai, tek iu ka referuar ndër të tjera sistemeve të mbrojtjes ajrore “Patriot”. 

Ai ka argumentuar gjithashtu mbi rëndësinë e mbështetjes së prodhimit të brendshëm ushtarak të Ukrainës.

Sa u përket marrëdhënieve të Ukrainës me SHBA-në, Zelensky ka thënë se “shpreson që ndoshta nesër ose në ditët në vijim... do të flas për këtë çështje me presidentin amerikan Donald Trump”. 

E Trumpi pritet të flasë sot me presidentin rus Vladimir Putin, për herë të gjashtë këtë vit.