Shefi i OKB-së sqaron deklaratat për luftën Izrael – Hamas, thotë se u keqinterpretua

Shefi i OKB-së, Antonio Guterres, ka thënë se është “i tronditur nga keqinterpretimet prej dikujt” për deklaratat e tij të martën në Këshillin e Sigurimit ku tha se është e rëndësishme të njihet se sulmet nga Hamasi nuk kanë ndodhur “në një vakum”.

“Sikur po justifikoheshin veprimet e terrorit nga Hamasi”, ka thënë ai. “Kjo është gënjeshtër. Ishte e kundërta”.

Guterres ka theksuar se dënon pa asnjë dyshim “veprimet terroriste të tmerrshme dhe të paprecedent të 7 tetorit nga Hamasi në Izrael”, raportoi BBC.

Ai ka thënë se një ditë më parë ka deklaruar se “asgjë nuk mund të justifikojë vrasjet, lëndimet dhe rrëmbimin e qëllimshëm të civilëve – apo lëshimin e raketave kundër caqeve civile”.

“Me të vërtetë unë fola për vuajtjet e popullit palestinez. Kështu qartë deklarova dhe citoj: ‘Por vuajtjet e popullit palestinez nuk mund të justifikojnë sulmet e tmerrshme nga Hamasi”.