-
Përktheu:
Flutura Gashi-Mehmeti
- 4 qershor 2025 11:55
- Shpërndaje në:
Një grup prej 57 vendesh, përfshirë të gjithë anëtarët e NATO-s, që po ndihmojnë Ukrainën, takohen sot në Bruksel për rundin e fundit të koordinimit se si ta ndihmojnë më mirë Kievin në luftën e tij të vazhdueshme kundër pushtimit rus.
Takimi vjen një ditë pasi Ukraina sulmoi me eksplozivë të vendosur nën ujë, urën e Kërçit të ndërtuar ilegalisht, e cila lidh gadishullin e Krimesë me Rusinë.
Projekti i rëndësishëm i Vladimir Putinit është goditur me më shumë se një ton metrikë eksplozivë, ka bërë të ditur të martën shërbimi i sigurisë SBU i Kievit.
Por agjencia e lajmeve Reuters raporton se sekretari amerikan i Mbrojtjes, Pete Hegseth nuk do të marrë pjesë në takimin e Grupit të Kontaktit për Mbrojtjen e Ukrainës sot, ndonëse ai parashihet që të marrë pjesë në një takim të NATO-s të enjten.
Mungesa e tij është e fundit në një seri hapash që Uashingtoni ka ndërmarrë për t'u distancuar nga përpjekjet e Ukrainës për të sprapsur pushtimin në shkallë të plotë të Rusisë, i cili filloi më 24 shkurt 2022.
Ndërkohë, Ukraina dhe Rusia kanë mbajtur të hënën rundin e dytë të bisedimeve për fundin e luftës, që ka përfunduar vetëm me një marrëveshje për lirimin e 6.000 trupave të ushtarëve të vrarë në luftë.
Edhe
Këshilltarët evropianë për sigurinë mbërrijnë në Kiev. Diskutojnë paqen dhe të ardhmen ekonomike
Po ashtu, në bisedimet që janë mbajtur në Stamboll të Turqisë, Ukraina ka pranuar nga Rusia të ashtuquajturin memorandum, i cili përmban kushtet e paqes, e për të cilin paka ukrainase ka thënë se do t’i duhet një javë për ta shqyrtuar.
Ukraina ia ka dorëzuar Rusisë kornizën e kushteve të saj paraprakisht.
