Qeveria e re e Sirisë djeg drogën e kohës së Assadit

Një sasi kanabisi dhe një milion tableta të ngjashme me amfetaminën “Captagon” janë djegur të mërkurën në Damask, raporton AP. 

Forcat e reja qeveritare të Sirisë bastisën magazinat në zonën e mëparshme të sigurisë të forcave të inteligjencës së ish-presidentit sirian, Bashar Assad dhe konfiskuan drogën.

Që nga rënia e Assadit, objekte prodhuese në shkallë industriale të amfetaminës “Captagon” janë zbuluar në të gjithë vendin, të cilat ekspertët thonë se ushqejnë një tregti globale vjetore prej 10 miliardë dollarësh të drogës.

Lufta civile gati 14-vjeçare e Sirisë copëtoi vendin, shkatërroi ekonominë dhe krijoi terren të mirë për prodhimin e “Captagon”.

Milicitë, komandantët e luftës dhe qeveria e Assadit e transformuan prodhimin e drogës nga një operacion në shkallë të vogël të drejtuar nga grupe kriminale në një rrjedhë të ardhurash industriale miliarda dollarëshe.

Forcat rebele siriane të udhëhequra nga HTS (Hayat Tahrir Al-Sham) kanë sekuestruar rezerva të mëdha të pilulave “Captagon” dhe drogave të tjera në disa baza ushtarake dhe magazina të tjera në Damask dhe fshatrat e tij.