Parlamenti francez voton pro legalizimit të vdekjes së asistuar

Parlamenti i Francës ka votuar në favor të një projektligji për legalizimin e vdekjes së asistuar, duke i hapur rrugën eutanazisë.

Deputetët kanë kaluar leximin e parë të projektligjit me 305 vota për dhe 199 kundër. Ata gjithashtu mbështetën njëzëri një ligj më pak të diskutueshëm që vendos të drejtën për kujdes paliativ në institucionet e specializuara për fundin e jetës, raporton The Guardian. 

Të dy projektligjet janë fillimi i një procesi të gjatë parlamentar që do të kërkojë që projektligjet të kalojnë në Senat - Dhoma e sipërme, dhe më pas të kthehen në dhomën e ulët për një lexim të dytë, që do të thotë se ato nuk kanë gjasa të bëhen ligj para vitit të ardhshëm.

Qeveria e ka përshkruar ligjin për të drejtën për të vdekur si "një përgjigje etike ndaj nevojës për të mbështetur të sëmurët dhe të vuajturit", duke këmbëngulur se ajo nuk është "as një e drejtë e re, as një liri ... por një ekuilibër midis respektit dhe autonomisë personale".

Legjislacioni do të lejonte një ekip mjekësor të vendosë nëse një pacient ka të drejtë të "fitojë qasje në një substancë vdekjeprurëse kur ata të kenë shprehur dëshirën". Pacientët do të jenë në gjendje ta përdorin vetë ose ta administrojnë atë nga një infermiere ose mjek "nëse nuk janë në gjendje fizike ta bëjnë vetë".

Pacientët duhet të plotësojnë një sërë kushtesh strikte: ata duhet të jenë mbi 18 vjeç, të kenë nënshtetësi ose rezidencë franceze dhe të vuajnë nga një "sëmundje serioze dhe e pashërueshme, kërcënuese për jetën, e avancuar ose terminale" që është "e pakthyeshme".

Sëmundja duhet të shkaktojë "vuajtje të vazhdueshme, të padurueshme fizike ose psikologjike", të cilat nuk mund të trajtohen me trajtim mjekësor, dhe pacienti duhet të jetë në gjendje të "shpreh lirisht dhe në mënyrë të informuar" dëshirën e tij për t'i dhënë fund jetës së tij.

Projektligji, i referuar në Francë si një ligj për "fundin e jetës" ose "ndihmë në vdekje" në vend të "vdekjes së ndihmuar" ose "eutanazi", është mbëeshtetur nga shumica e deputetëve centrist të Emmanuel Macronit dhe aleatëve të tyre nga e majta, teksa shumica e deputetëve të djathtë votuan kundër.