Netanyahu kërkon që të falet në gjyqin për korrupsion

Kryeministri izraelit, Benjamin Netanyahu, i ka paraqitur të dielën një kërkesë presidentit të vendit për falje në gjyqin shumëvjeçar ndaj tij për korrupsion.

Kërkesa për falje është bërë duke argumentuar se procedurat penale po pengonin aftësinë e tij për të qeverisur, dhe se një falje do t'u shërbente interesave të shoqërisë izraelite, raporton Reuters.

Netanyahu, kryeministri më jetëgjatë në vend, i ka mohuar prej kohësh akuzat për ryshfet, mashtrim dhe shkelje të besimit. 

Avokatët e tij kanë thënë në një letër drejtuar zyrës së presidentit se kryeministri ende beson se procedurat ligjore do të rezultonin në një lirim të plotë nga akuzat.

"Avokatët e mi i dërguan sot një kërkesë për falje ,presidentit të vendit. Pres që kushdo që dëshiron të mirën e vendit ta mbështesë këtë hap", ka thënë Netanyahu në një videodeklaratë të shkurtër të lëshuar nga partia e tij politike, Likud.

Javë më parë, faljen e Netanyahut e ka kërkuar zyrtarisht edhe presidenti amerikan, Donald Trump.