Ndryshimi i klimës po rrezikon edhe zogjtë shtegtarë

Kushtet më të nxehta dhe më të thata për shkak të ndryshimeve klimatike e bëjnë të vështirë për speciet shtegtare që po humbin burimet e tyre ujore dhe bazat e shumimit, me shumë prej tyre tani të rrezikuara ose të detyruara t’i ndryshojnë tërësisht modelet e migrimit duke u vendosur në zona më të freskëta veriore

Zogjtë shtegtarë të Afrikës kërcënohen nga ndryshimi i modeleve të motit në qendër dhe në lindje të kontinentit që kanë varfëruar sistemet natyrore të ujit dhe kanë shkaktuar thatësi ​​shkatërruese.

Kushtet më të nxehta dhe më të thata për shkak të ndryshimeve klimatike e bëjnë të vështirë për speciet shtegtare që po humbin burimet e tyre ujore dhe bazat e shumimit, me shumë prej tyre tani të rrezikuara ose të detyruara t’i ndryshojnë tërësisht modelet e migrimit duke u vendosur në zona më të freskëta veriore.

Përafërsisht 10% e më shumë se 2.000 llojeve të shpendëve të Afrikës, duke përfshirë dhjetëra zogj shtegtarë, janë të kërcënuar, me 28 lloje - të tilla si shqiponja e Madagaskarit, skifteri Taita dhe shkaba me tufë - të klasifikuara si "të rrezikuara në mënyrë kritike". Mbi një e treta e tyre janë veçanërisht të prekshme ndaj ndryshimeve klimatike dhe motit ekstrem, thuhet në analizën e grupit mjedisor BirdLife International.

"Zogjtë po preken nga ndryshimet klimatike ashtu si çdo specie tjetër", tha koordinatori i politikave të BirdLife, Ken Mwathe. “Zogjtë migratorë preken më shumë se grupet e tjera të shpendëve, sepse ata duhet të vazhdojnë të lëvizin”, gjë që e bën më të mundshëm që një vend ku ata mbështeten gjatë udhëtimit të tyre të jetë degraduar në një farë mënyre.

Rruga fluturuese afrikano-euroaziatike, korridori i fluturimit për zogjtë që udhëtojnë në jug përmes Detit Mesdhe dhe shkretëtirës së Saharasë për dimër, strehon mbi 2.600 vende për zogjtë migrues. Rreth 87% e vendeve afrikane janë në rrezik nga ndryshimet klimatike, një përqindje më e madhe se në Evropë apo Azi, zbuloi një studim i agjencisë së mjedisit të Kombeve të Bashkuara dhe grupit të ruajtjes Wetlands International.

Afrika është më e ndjeshme ndaj ndryshimeve klimatike, sepse është më pak në gjendje të përshtatet, tha Evans Mukolwe, meteorolog në pension dhe drejtor shkencor në Organizatën Botërore Meteorologjike.

“Varfëria, degradimi i biodiversitetit, ngjarjet ekstreme të motit, mungesa e kapitalit dhe aksesi në teknologjitë e reja” e bëjnë më të vështirë për kontinentin mbrojtjen e habitateve për speciet e egra, tha Mukolwe.

Temperaturat më të nxehta për shkak të ndryshimeve klimatike të shkaktuara nga njerëzit dhe reshjeve të pakta zvogëlojnë zonat kryesore ligatinore dhe burimet e ujit, në të cilat mbështeten zogjtë gjatë udhëtimeve migratore.

“Liqeni Çad është një shembull”, tha Mwathe. “Para se zogjtë të kalojnë Saharën, ata ndalojnë pranë Liqenit Çad dhe më pas kalojnë në hemisferën veriore ose jugore. Por, Liqeni Çad është zvogëluar me kalimin e viteve, gjë që komprometon aftësinë e tij për t’i mbështetur zogjtë, tha ai.