Më shumë se 7.300 njerëz u evakuuan nga Ukraina të premten

Pushtimi i Ukrainës ka hyrë të premten në ditën e 30-të. Qindra civilë në mesin e të cilëve më shumë se 120 fëmijë janë vrarë deri tani si pasojë e sulmeve ruse

23:28 - Zelensky thotë se më shumë se 16 mijë trupa ruse janë vrarë deri tani

Presidenti i Ukrainës, Volodymyr Zelensky, ka mbajtur fjalimin e mbrëmjes. Ai ka pohuar se më shumë se 16 mijë trupa ruse janë vrarë që nga fillimi i luftës dhe komandantë të lartë kanë qenë në mesin e viktimave, shkruan Sky.

---

23:00 - Ligji i ri i Putinit, rusët që përhapin lajme të rreme mund të përballen me burgim deri në 15 vjet

Presidenti rus Vladimir Putin ka miratuar zyrtarisht një ligj që thotë se personat e shpallur fajtorë për përhapjen e lajmeve të rreme për punën e zyrtarëve jashtë vendit mund të dënohen deri në 15 vjet burgim, ka raportuar agjencia e lajmeve Interfax.

---

22:32 - Kush janë shtatë gjeneralët e vrarë rusë në Ukrainë

Zyrtarët perëndimorë kanë pretenduar se shtatë gjeneralë rusë janë vrarë deri më tani në luftën në Ukrainë.

---

22:12 - Më shumë se 7.300 njerëz u evakuuan nga Ukraina të premten

Gjithsej 7.331 njerëz u evakuuan nga qytetet anembanë Ukrainës përmes korridoreve humanitare të premten, tha një zyrtar i lartë ukrainas.

---

21:26 - Rusia ka humbur kontrollin e plotë të Khersonit, sipas SHBA-së

Trupat ruse nuk e kanë më kontrollin e plotë të qytetit jugor të Ukrainës, Kherson, pas një kundërsulmi nga forcat ukrainase, ka thënë një zyrtar i lartë i mbrojtjes amerikane të premten, shkruan Sky.

---

20:49 - Disa ndërtesa të goditura nga raketat ruse në Vinnytsia, pretendon Forca Ajrore e Ukrainës

Disa ndërtesa në rajonin qendror perëndimor të Vinnytsias janë goditur nga raketat ruse, ka pohuar Forca Ajrore e Ukrainës.

---

19:00 - SHBA: Rusia ka ndaluar lëvizjet tokësore drejt Kievit dhe ka lëvizur në pozicione mbrojtëse

Forcat ruse rreth kryeqytetit të Ukrainës, Kiev, janë tani në pozicione mbrojtëse dhe kanë ndalur çdo interes për të ecur drejt kryeqytetit, megjithëse sulmet ajrore dhe sulmet me rreze të gjatë vazhdojnë ende, sipas një zyrtari të lartë të mbrojtjes amerikane, shkruan CNN.

---

18:19 - Spotify pezullon shërbimin në Rusi

Platforma muzikore Spotify ka pezulluar shërbimet në Rusi për shkak të pushtimit të Ukrainës, ka konfirmuar një zëdhënës për The Guardian të premten.

---

17:59 - Zvicra vendos edhe më shumë sanksione ndaj Rusisë

Zvicra neutrale ka miratuar më shumë sanksione të Bashkimit Evropian kundër Rusisë për pushtimin e Ukrainës, ka thënë Qeveria e vendit, shkruan Sky.

---

17:33 - Rusia publikon të dhënat për vdekjen e ushtarëve, për herë të parë nga 2 marsi

Ushtria ruse ka thënë të premten se 1351 ushtarë të saj janë vrarë në luftën në Ukrainë dhe 3825 të tjerë janë lënduar, në përditësimin e parë të të dhënave për vdekjet, që nga 2 marsi.

---

16:53 - Komandanti i brigadës ruse u vra nga trupat e veta, pretendojnë zyrtarët perëndimorë

Një komandant i brigadës ruse në Ukrainë është vrarë nga trupat e tij, kanë pohuar zyrtarët perëndimorë të premten, shkruan Sky.

---

16:48 - Cilat shtete po blejnë ende naftë ruse?

Australia, Britania, Kanadaja dhe Shtetet e Bashkuara e kanë ndaluar plotësisht blerjen e naftës ruse pas pushtimit të Ukrainës – por shtetet mbeten të ndara, raporton Sky.

---

16:39 - Orban refuzon kërkesat e Zelenskyt, s’ka ndihmë ushtarake për Ukrainë e as sanksione për Rusinë

Kryeministri hungarez Viktor Orban ka refuzuar kërkesat e presidentit ukrainas Volodymyr Zelensky për lejimin e transferimeve të armëve në Ukrainë dhe sanksione më të ashpra kundër Rusisë, duke thënë se kjo do të ishte "kundër interesave të Hungarisë", shkruan BBC.

---

14:51 - Të paktën 1081 civilë u vranë në Ukrainë

Zyra për të drejta e Kombeve të Bashkuara ka thënë të premten se tashmë është e konfirmuar se 1081 civilë kanë vdekur dhe 1707 janë lënduar në Ukrainë që kur Rusia filloi pushtimin më 24 shkurt, raporton Reuters. Shifra reale besohet të jetë shumë më e lartë.

Herët të premten, video u publikuan që tregonin rusët që bombardonin civilët që po merrnin ndihma humanitare në Kharkiv.

SHBA-ja zyrtarisht ka akuzua forcat ruse për kryerje të krimeve të luftës dhe ka thënë se do të kërkojë përgjegjësi me çdo mjet të mundshëm.

---

14:34 - KB: Ka varre masive në Mariupol, një me 200 trupa

Kreu i ekipit të Kombeve të Bashkuara për të drejtat e njeriut në Ukrainë ka thënë të premten se monitoruesit kanë pranuar informacione në rritje për varre masive në qytetin e rrethuar të Mariupolit, përfshirë një me 200 trupa.

“Kemi marrë informacione në rritje për varre masive që janë atje”, ka thënë Matilda Bogner, duke shtuar se disa nga provat erdhën nga imazhet satelitore, raporton The Guardian.

Bogner ka thënë se vdekjet e civilëve në Ukrainë kanë tejkaluar shifrën 1035 dhe se ekipi i KB-së po hetonte sulmet pa dallim nga të dyja palët. KB-ja ka thënë se ka pranuar pretendime që rusët po vrasin civilët në vetura gjatë evakuimeve dhe ka raste të dokumentuara të zhdukjeve të detyruara të zyrtarëve ukrainas, që duket se janë marrë peng.

---

14:22 - SHBA-ja dhe NATO me plan emergjent nëse Rusia sulmon territorin e aleancës, thotë Shtëpia e Bardhë

SHBA-ja dhe NATO-ja po bëjnë një plan emergjence për mundësinë nëse Rusia zgjedh të godasë territorin e NATO-s, ka thënë të premten këshilltari i Sigurisë Kombëtare i Shtëpisë së Bardhë, Jake Sullivan.

Lajmi i plotë KËTU

---

12:13 - Katër të vrarë nga sulmi rus në një qendër mjekësore në Kharkiv

Katër civilë janë vrarë dhe disa të tjerë janë plagosur pasi sulmet ruse goditën të premten një qendër mjekësore në Kharkiv, ka bërë të ditur policia lokale, raporton BBC.

Kharkiv është qyteti i dytë më i madh i Ukrainës dhe ndodhet pranë kufirit rus në lindje.

“Sot në mëngjes, pas një bombardimi në infrastrukturën civile nga disa raketahedhës, shtatë civilë u plagosën, katër prej tyre vdiqën”, thuhet në deklaratën e policisë.

Sulmet kishin shënjestruar një qendër mjekësore në lagjen Osnovyansky të qytetit, ka bërë të ditur Policia.

Forcat ruse janë përpjekur pa sukses të rrethojnë Kharkivin, me analistët që thonë se u mungon municioni.

Korrespondenti i BBC-së, Quentin Sommerville, thotë se rezistenca e Ukrainës në qytet ka frustruar rusët, të cilët janë kthyer në sulme artilerie, duke shkatërruar lagje të tëra.

---

10:30 - Rreth 300 të vdekur deri tani nga sulmi në teatrin e Mariupolit

Bombardimi i teatrit në Mariupol javën e kaluar ka shkaktuar reagime ndërkombëtare, sidomos pas shfaqjes së pamjeve ku shihej se jashtë teatrit ishte shkruar me shkronja të mëdha në gjuhën ruse “Fëmijë”.

Këshilli i qytetit të Mariupolit ka raportuar të premten se rreth 300 persona kanë mbetur të vdekur si pasojë e këtij sulmi, raporton Sky News.

“Fatkeqësisht po e nisim ditën me këtë lajm të keq. Dëshmitarët kanë raportuar se rreth 300 njerëz kanë vdekur nga sulmi në teatër”, thuhet në njoftimin e Këshillit.

Shumë persona kanë mbetur të ngujuar për ditë të tëra në bodrumin e teatrit, ku po strehoheshin sipas llogaritjeve mijëra njerëz.

Ata nuk mund të evakuoheshin për shkak të sulmeve të vazhdueshme ruse në këtë qytet, i cili deri tani është më i shkatërruari nga lufta në Ukrainë.

---

09:50 - Ukraina thotë se 135 fëmijë janë vrarë që nga fillimi i pushtimit

Zyra e Prokurorit të Përgjithshëm të Ukrainës ka thënë se 135 fëmijë janë vrarë dhe 184 janë plagosur që nga fillimi i pushtimit rus në Ukrainë, raporton të premten BBC.

Duke dhënë një përditësim mbi viktimat e fundit, zyrtarët thonë se dy fëmijë u vranë gjatë luftimeve të ashpra në qytetin Rubizhne, rajoni i Luhanskut. Dhe të enjten, dy fëmijë të moshës gjashtë dhe 13 vjeç u plagosën në Novomykhailivka, rajoni Donetsk, pas bombardimeve ruse.

Prokurorët shtuan se tre adoleshentë - të moshës 13, 14 dhe 15 vjeç - u hodhën në erë nga një minë në Obilne në rajonin e Zaporizhias.

---

08:46 - Një korridor për largimin e civilëve nga Mariupoli pritet të hapet sot

Ukraina po shpreson që të hapet një korridor humanitar nga Mariupoli të premten, për ata që mund të udhëtojnë me veturë private, raporton Reuters.

Në ditët e fundit, korridoret humanitare janë hapur në disa zona në Ukrainë, por gjithmonë është përjashtuar qyteti port i rrethuar i cili është në gjendje të rëndë për javë për shkak të bombardimeve.

---

08:32 - Inteligjenca britanike: Ukraina po zmbraps forcat ruse

Ministria britanike e Mbrojtjes ka publikuar njoftimin e ri të inteligjencës të premten për luftën në Ukrainë, ku ka thënë se Ukrainë ka mundur të rimarrë qytete dhe pozicione mbrojtëse në lindje të kryeqytetit, Kiev.

Ministria ka njoftuar se Ukraina po ashtu ka pasur sukses në shtyrjen e forcave ruse prapa nga toka që kishin marrë në veriperëndim të Kievit. Shtoi se në jug forcat ruse ende po tentojnë të shkojnë përpara Odesas.

---

07:53 - Raketat ruse po dështojnë në shkallë të lartë, thonë zyrtarë amerikanë

Raketat ruse po pësojnë një shkallë dështimi deri në 60%, kanë pohuar të premten shumë zyrtarë të paidentifikuar amerikanë në një raport të Reuters.

Lajmin e plotë mund ta lexoni KËTU

---

07:39 - Ukraina pretendon se ka shkatërruar një anije të madhe ruse

Zyrtarë ushtarakë ukrainas kanë deklaruar të enjten se kanë arritur të shkatërrojnë një anije të madhe ruse, të quajtur Saratov, në qytetin port të okupuar të Berdyanskut.

Një tjetër anije, Orsk, u shkatërrua gjithashtu dhe disa anije të tjera u dëmtuan, thanë zyrtarët ushtarakë, raporton BBC.

Në një konferencë të mëparshme, ushtria e Ukrainës pohoi se Rusia mbetet e fokusuar në pushtimin e Ukrainës jugore, në një përpjekje për të krijuar një "urë tokësore" në territorin e pushtuar të Krimesë.

Ata ende po përpiqen të kapin qytetet e Popasna, Rubizhne dhe Mariupol në jug, por deri më tani nuk kanë pasur "asnjë sukses", sipas ushtrisë ukrainase.

Në Sumy dhe Kharkiv, rusët po sulmojnë infrastrukturën civile, thuhet në raport, duke shtuar se disa forca ruse po tërhiqen pasi kanë pësuar humbje deri në 50%.

---

07: 23 - Zelensky - Evropës: U vonuat për ta ndaluar Rusinë

Presidenti ukrainas, Volodymyr Zelensky, ka thënë mbrëmjen e së enjtes se Evropa ka reaguar shumë vonë për ta ndaluar pushtimin e Ukrainës.

Zelensky këtë deklaratë e ka bërë gjatë fjalimit të tij për Samitin e Këshillit Evropian që është mbajtur në Bruksel, raporton BBC.

Presidenti Zelensky gjatë fjalimit të tij e përshkroi shkatërrimin që Rusia i ka shkaktuar vendit të tij derisa ka falënderuar edhe Evropën për bashkimin në mbështetjen e saj për Ukrainën.

“Ju keni aplikuar sanksione, ju jemi mirënjohës. KëtA janë hapa të fuqishëm. Por ishte pak vonë, kishte një shans”, ka thënë ai, duke shtuar se nëse do të kishte pasur sanksione parandaluese, ndoshta Rusia nuk do të kishte shkuar në luftë.

Ai gjithashtu vuri në dukje gazsjellësin Nord Stream 2, ku sugjeroi se nëse do të ishte bllokuar më herët, "Rusia nuk do të kishte krijuar një krizë gazi".

Zelensky më pas iu lut vendeve fqinje që të miratojnë kërkesën e Ukrainës për t'u bashkuar me BE-në.

"Këtu ju kërkoj - mos u vononi", ka deklaruar Zelensky.

Në javët e fundit Zelensky ka mbajtur shumë fjalime në parlamentet në mbarë botën, dhe ai nuk ka pasur frikë të qortojë Perëndimin për atë që ai e sheh si dështimin e tij për të ofruar mbështetje të mjaftueshme.