Presidenti francez, Emmanuel Macron, ka mbajtur të martën takime me kryetarët e 220 qyteteve të vendit, pas trazirave të dhunshme që zgjatën për gjashtë net radhazi, si pasojë e vrasjes nga policia e një 17-vjeçari në periferi të Parisit.
Që nga nisja e trazirave, gjithsej 99 bashki janë përballur me sulme gjatë protestave, përfshirë ato në shkolla, stacione policore dhe objekte të tjera institucionesh publike, njoftuan nga Ministria e Brendshme.
Të hënën turmat u mblodhën në bashkitë e gjithë Francës në shenjë solidariteti me qeveritë lokale që ishin në shënjestër.
Trazirat u nxitën nga një reagim, kryesisht prej adoleshentëve, kundër shtetit francez për të cilin shumë të rinj me rrënjë emigrante thonë se po i diskriminon në mënyrë rutinore.
Mosha mesatare e 3 mijë e 354 personave të arrestuar gjatë javës së shkuar ishte 17-vjeçare, bëri të ditur ministri i Brendshëm.
