Lukashenko: Rrezik i lartë për incidente ushtarake përgjatë kufirit me Ukrainën

Presidenti i Bjellorusisë, Alexander Lukashenko, ka thënë të enjten se rreziku për incidente ushtarake përgjatë kufirit të vendit të tij me Ukrainën është i lartë, raporton Reuters, duke cituar agjencinë e lajmeve RIA.

RIA po ashtu ka cituar Lukashenkon të ketë thënë se Polonia fqinje nuk duhet të presë aksione agresive nga Bjellorusia.

Lukashenko u citua të thoshte se Bjellorusia megjithatë kishte zhvendosur disa batalione të gatshme luftarake nga rajoni i Vitebsk, i vendosur në kufirin e tij me Rusinë, për në kufijtë perëndimor të vendit.

Në një raport tjetër nga Reuters, duke cituar agjencinë shtetërore ruse të lajmeve Tass, Lukashenko u citua të ketë thënë se kushtet ishin gati për të filluar bisedimet e paqes Rusi-Ukrainë.

Presidenti bjellorus ka thënë se tekstet paraprake të diskutuara midis zyrtarëve rusë dhe ukrainas në Turqi në javët e para të luftës mund të shërbejnë si pikënisje për negociatat.

Tass citoi gjithashtu Lukashenkon, një aleat i ngushtë i presidentit rus, Vladimir Putin, të ketë thënë se mund të ketë një "apokalips" nëse Rusia përdor armë bërthamore në hakmarrje për veprimet perëndimore.