Kryeministri më i ri në historinë holandeze merr betimin nga mbreti

Mbreti holandez Willem-Alexander ka dhënë të hënën betimin për qeverinë e re të koalicionit minoritar, të udhëhequr nga kryeministri më i ri në historinë e Holandës.

Rob Jetten, 38 vjeç, do të drejtojë një administratë me tri parti, e përbërë nga partia e tij centriste D66, Kristian Demokratët e qendrës së djathtë dhe Partia Popullore për Liri dhe Demokraci, gjithashtu e qendrës së djathtë.

Së bashku, këto parti mbajnë vetëm 66 nga 150 vendet e dhomës së ulët të parlamentit, kështu që Jetten do të duhet të negociojë me deputetët e opozitës për të siguruar mbështetje për çdo ligj që qeveria e tij dëshiron të miratojë.

Jetten dhe ekipi i tij i ministrave morën betimin nga mbreti në Sallën madhështore “Orange Hall” të pallatit mbretëror, në një pyll në periferi të Hagës. Mbreti i uroi qeverisë së re fat “në kohë të pasigurta”.

Një grup i vogël protestuesish nga organizata mjedisore Extinction Rebellion protestuan jashtë portave të pallatit gjatë ceremonisë dhe lëshuan sirena ndërsa ministrat e rinj po bënin fotografinë zyrtare. 

Në një mesazh në platformën X, Jetten ka thënë se ishte “një nder i jashtëzakonshëm të filloj punën si kryeministër”.

Edhe Botë 31 tet 2025 “Fushata pozitive” mposht lëvizjen populiste në Holandë

Qeveria mori betimin 117 ditë pas zgjedhjeve kombëtare, të cilat partia e Jetten i fitoi me një diferencë të ngushtë ndaj Partisë për Liri të udhëhequr nga ligjvënësi anti-islam, Geert Wilders. Rezultati përfundimtar u vendos vetëm pas numërimit të votave me postë, pas zgjedhjeve të katërta kombëtare që nga viti 2017 në Holandën politikisht të fragmentuar.

Qeveria e re mori detyrën një ditë para përvjetorit të katërt të pushtimit në shkallë të plotë të Ukrainës nga Rusia. 

Jetten ka premtuar të vazhdojë mbështetjen e fortë të vendit të tij për Kievin në përballjen me forcat e presidentit rus Vladimir Putin.