Liberalët fytafyt me të djathtët në Holandë

Partia liberale qendrore D66, e udhëhequr nga Rob Jetten, është në garë shumë të ngushtë me partinë populiste të djathtë të Geert Wildersit në zgjedhjet holandeze, sipas rezultateve pothuajse të plota.

Me rreth 99% të votave të numëruara, si D66 ashtu edhe Partia për Lirinë e Wildersit (PVV) pritet të marrin nga 26 vende në parlamentin 150-anëtarësh, sipas projeksioneve të agjencisë holandeze të lajmeve ANP, të enjten.

Sondazhet e para pas votimit e kishin vendosur Jetten në krye. “Miliona holandezë kanë kthyer faqen; ata i kanë thënë lamtumirë politikës së negativitetit”, u tha ai mbështetësve të tij.

Ndërkohë, Geert Wilders u shfaq i mërzitur dhe ka pranuar se rezultati nuk ishte ai që dëshironte, pasi humbi 11 vende në krahasim me zgjedhjet e kaluara. Megjithatë, ai ka thënë se ky ishte ende rezultati i tij i dytë më i mirë ndonjëherë.

Kur u numëruan votat e fundit të enjten, gara u bë aq e ngushtë sa avantazhi kalonte herë te njëri e herë te tjetri. Por, rezultatet përfundimtare nga Amsterdami e çuan ndjeshëm përpara Rob Jettenin me mbi 15 mijë vota më shumë.

Të dy partitë morën më pak se 17% të votave kombëtare, ndërsa tri parti të tjera ishin shumë afër: partia konservatore-liberale VVD me 22 vende, pasuar nga koalicioni i majtë GreenLeft-Labour dhe Kristiandemokratët.

Gjatë gjithë fushatës, Wilders kishte udhëhequr në sondazhe, por pasi rrëzoi vetë koalicionin e tij në qershor për shkak të mosmarrëveshjeve mbi çështjet e azilit dhe migracionit, shumica e liderëve të tjerë politikë thanë se nuk do të bashkëpunonin më me të.

Wilders e pranoi se ka pak shpresë për të formuar qeveri vetë, por tha në rrjetin X se, nëse partia e tij do të dilte e para, ai duhet të ishte i pari që të përpiqej të krijonte qeverinë.

Edhe pa një fitore të qartë, Jetten, i cili zhvilloi një fushatë të suksesshme, ka më shumë gjasa të udhëheqë qeverinë e ardhshme. Vetëm pak javë më parë, sondazhet i jepnin D66-s vetëm 12 vende.

Lideri 38-vjeçar, i njohur për pamjen e tij tërheqëse dhe mënyrën e qetë të të folurit, fitoi mbështetje përmes paraqitjeve të mira në debatet televizive dhe intervista. Madje, pjesëmarrja e tij në emisionin televiziv “Personi më i zgjuar” pak para zgjedhjeve, e bëri edhe më të njohur në publik.

Megjithëse mbështetësit e tij festuan, Jetten nuk shpalli fitoren të mërkurën në mbrëmje.

Partia konservatore-liberale VVD e Dilan Yesilgoz doli në vendin e tretë dhe mund të jetë një partnere e mundshme në një koalicion të udhëhequr nga Jetten.

Para votimit të së mërkurës ishte e qartë se zgjedhjet do të ishin shumë të ngushta, pasi pesë parti kishin shanse për të fituar. Partia e Wildersit kishte fituar 37 vende në zgjedhjet e nëntorit 2023, por shumë votues këtë herë duket se e braktisën, pasi e kuptuan se ai do ta kishte të vështirë të gjente partnerë për qeveri.

Në vitin 2024, Wilders arriti të formonte një qeveri pas shtatë muajsh negociatash, por ajo u rrëzua vetëm 11 muaj më vonë.