Lideri i së djathtës ekstreme braktis koalicionin në Holandë

Lideri i së djathtës ekstreme, Geert Wilders, ka thënë të martën se partia e tij PVV do të largohet nga koalicioni, duke rrëzuar qeverinë aktuale në kërkim të zgjedhjeve të reja, shkruan Reuters.

Wilders ka thënë se partnerët e koalicionit s’ishin të gatshëm të pranonin idetë e tij për të ndaluar migrimin, për të cilën kishte kërkuar mbështetje javën e kaluar.

“Asnjë nënshkrim për planet tona të azilit. PVV largohet nga koalicioni”, ka shkruar ai në rrjetin social X.

Lëvizja e befasishme e Wildersit i jep fund një koalicioni tashmë të brishtë, që ka pasur vështirësi të arrijë konsensus në çështje të ndryshme që nga formimi i tij në korrikun e vitit që shkoi.

Ka të ngjarë që kjo të sjellë zgjedhje të reja brenda pak muajsh, duke shtuar pasigurinë politike në ekonominë e pestë më të madhe të eurozonës.

Ndër të tjera, këto zhvillime gjithashtu mund të vonojnë vendimin mbi rritjen historike të shpenzimeve të mbrojtjes për të përmbushur objektivat e reja të NATO-s.

Populisti anti-mysliman Wilders ishte fituesi i zgjedhjeve paraprake, mirëpo sondazhet e fundit kanë treguar se ai ka humbur mbështetjen që kur iu bashkua qeverisë.