Këtë javë pritet vazhdimi i bisedimeve Ukrainë -SHBA për mineralet e rralla

Ukraina do të dërgojë një ekip në Uashington këtë javë për të ecur përpara me negociatat për një marrëveshje më të gjerë mineralesh të paraqitur nga Shtetet e Bashkuara, ka njoftuar të hënën  zëvendëskryeministrja Yulia Svyrydenko në X. 

Administrata e SHBA-së dëshiron që Kievi të pranojë t'i japë asaj një pjesë të madhe në të ardhurat e ardhshme të Ukrainës nga mineralet, raporton Reuters.

Presidenti amerikan, Donald Trump e sheh atë si një mënyrë për të rikthyer miliarda dollarë ndihma për luftën e Ukrainës kundër Rusisë. Kievi është i shqetësuar për të ruajtur mbështetjen e aleatit të tij, por i kujdesshëm sa i përket heqjes dorë nga pasuria e tij. 

Në fund të marsit, Uashingtoni i ka paraqitur Kievit një draft të rishikuar dukshëm më të gjerë se një version i mëparshëm që ishte rënë dakord.

Svyrydenko ka thënë se dialogu me SHBA-në pasqyron interesat strategjike të vendeve dhe "angazhimin tonë të përbashkët për ndërtimin e një partneriteti të fortë dhe transparent".

Edhe Botë 30 pri 2025 Ukraina pritet të nënshkruajë të mërkurën marrëveshjen për mineralet me SHBA-në

Delegacioni ukrainas në Uashington do të përfshijë përfaqësues të ministrive të Ekonomisë, të Jashtme, Drejtësisë dhe Financave, ka njoftuar ajo.

Zyrtarët e Kievit kanë qenë të kujdesshëm në komentimin e draftit, një përmbledhje e të cilit sugjeronte se SHBA-ja do të kërkonte të gjitha të ardhurat nga burimet natyrore të Ukrainës për vite me radhë.