Një sulm izraelit ka lënë të vdekur dy palestinezë në lagjen Tuffah, në veri të Rripit të Gazës, të dielën, teksa katër të tjerë kanë mbetur të plagosur në një incident të veçantë në qytetin e Gazës, kanë njoftuar autoritetet lokale shëndetësore.
Punonjësit mjekësorë kanë thënë se një dron izraelit ka shpërthyer mbi tarracën e një ndërtese shumëkatëshe në qytetin e Gazës, duke plagosur katër civilë që ndodheshin në rrugën aty pranë.
Ushtria izraelite nuk ka komentuar asnjërin nga incidentet.
Gaza është kthyer në gërmadha nga lufta që shpërtheu pas sulmit të grupit militant palestinez Hamas ndaj Izraelit jugor më 7 tetor 2023, sulm që vrau 1.200 persona, sipas shifrave izraelite.
Ministria e Shëndetësisë në Gazë thotë se më shumë se 71.000 njerëz, kryesisht civilë, janë vrarë nga ofensiva izraelite që prej asaj kohe.
Sipas saj, të paktën 480 persona janë vrarë nga sulmet izraelite që kur marrëveshja e armëpushimit hyri në fuqi tetorin e kaluar.
E Izraeli thotë se katër ushtarë të tij janë vrarë nga militantët në Gazë që nga fillimi i armëpushimit. Të dyja palët kanë shkëmbyer akuza për shkelje të armëpushimit.
Këtë muaj, Washingtoni zyrtar ka njoftuar se plani ka kaluar në fazën e dytë, sipas së cilës Izraeli pritet të tërheqë më tej trupat nga Gaza, ndërsa Hamasi duhet të dorëzojë kontrollin e administrimit të territorit.
Të dërguarit amerikanë Steve Witkoff dhe Jared Kushner janë takuar të shtunën në Izrael me kryeministrin izraelit, Benjamin Netanyahu, kryesisht për të diskutuar situatën në Gazë, kanë thënë dy persona të informuar mbi çështjen, ndërkohë që autoritetet lokale raportuan sulme të mëtejshme në enklavë.