Një marrëveshjeje ndërkombëtare me Iranin e dizajnuar për ta mbajtur botën të sigurt nga armët atomike ka përfunduar zyrtarisht, me Teheranin që ka shpallur ndërprerjen e marrëveshjes 10-vjeçare.
Irani ka thënë të shtunën se nuk është më i detyruar që të respektojë kufizimet mbi programin e tij bërthamor dhe se nuk është më i lidhur me marrëveshjen e vitit 2015, zyrtarisht e njohur si Plani i Përbashkët Gjithëpërfshirës i Veprimit, sipas të cilës sanksionet ndërkombëtare ishin hequr në këmbim të kufizimeve mbi programin bërthamor të Teheranit.
Që tani e tutje “të gjitha dispozitat e marrëveshjes së 2015-s, përfshirë kufizimet mbi programin bërthamor iranian dhe mekanizmat që lidhen me të konsiderohen të përfunduara”.
Megjithatë, ka shtuar se shteti “shpreh përkushtimin e tij në diplomaci”, raportoi Guardian.
E nënshkruar në Vjenë nga Irani, Kina, Britania, Franca, Gjermania, Rusia dhe SHBA-ja, marrëveshja shpresohej se do t’i jepte fund ngërçit diplomatik dhe do shënonte një epoke të re në marrëdhëniet mes Iranit dhe Perëndimit.
Edhe
OKB-ja rikthen sanksionet ndaj Iranit 10 vjet pasi i hoqi ato
Më 2018, gjatë mandatit të parë si president Donald Trumpi e largoi SHBA-në nga marrëveshja dhe rivendosi sanksione. Si rezultat i kësaj, Teherani nisi rritjen e programit bërthamor. Pas luftës 12-ditore Iran-Izrael në qershor të këtij viti, edhe shtetet tjera nënshkruese rikthyen sanksionet. Hyrja në fuqi e sanksioneve e bëri formalitet ndërprerjen e marrëveshjes, që si ditë u caktua 18 tetori, saktësisht 10 vjet pas miratimit të rezolutës 2231 të OKB-së.
Irani pritet ta shpallë ndërprerjen e marrëveshjes me një deklaratë më vonë të shtunën në OKB.
