Gjenerali italian, Roberto Vannacci lanson parti të ekstremit të djathtë

Gjenerali Roberto Vannacci ka lansuar të dielën partinë e tij të re të ekstremit të djathtë, duke paraqitur një sfidë të drejtpërdrejtë ndaj kryeministres italiane, Giorgia Meloni, ndërsa synon ta shtyjë Italinë drejt një kursi më të ashpër dhe më nacionalist përpara zgjedhjeve të vitit të ardhshëm.

I prezantuar nga një zyrtar i partisë si një “Jul Cezar i ditëve moderne”, ish-parashutisti 57-vjeçar është pritur me brohoritje ndërsa po dilte në skenën e kongresit inaugurues të partisë “Futuro Nazionale”.

“Ne përfaqësojmë të refuzuarit dhe të përbuzurit, dhe jemi krenarë për këtë”, ka deklaruar Vannacci, i cili po përpiqet të pozicionohet më djathtas se koalicioni konservator i Melonit, katër muaj pasi u largua nga partia “League” e zëvendëskryeministrit, Matteo Salvini.

Lëvizja populiste e Vannaccit po rezulton tashmë me rreth 5% mbështetje në sondazhe, duke iu afruar nivelit të partisë “Lega” dhe duke rrezikuar të komplikojë planet e Melonit për të ruajtur pushtetin në zgjedhjet kombëtare të vitit të ardhshëm, përveç nëse ajo arrin një marrëveshje elektorale me të.

Megjithatë, një aleancë e tillë do të përmbante rreziqe të mëdha për Melonin, pasi mund të largojë votuesit më të moderuar, të shqetësuar nga qëndrimet anti-BE, pro-Rusi dhe lidhjet e ngushta të Vannaccit me parti të ekstremit të djathtë në Evropë, si “Alternativa për Gjermaninë” në Gjermani.

Duke u paraqitur si zëri më i ashpër kundër emigracionit në Itali, Vannacci ka deklaruar të dielën se do të ulte numrin e të huajve që jetojnë në vend në rreth 4% të popullsisë totale, nga afërsisht 12% që vlerësohet aktualisht.

“Nuk kemi një program për emigracionin, ne kemi një program për riemigrimin”, ka thënë ai mes duartrokitjeve dhe brohoritjeve të mbështetësve të tij.