-
Përktheu:
Flutura Gashi-Mehmeti
- 18 dhjetor 2025 11:54
- Shpërndaje në:
Bashkimi Evropian duhet të reformohet ose rrezikon të bëhet i parëndësishëm, pasi rivaliteti midis Kinës dhe SHBA-së po nxit një epokë të re të paprecedent, duke paraqitur sfida për sigurinë, energjinë, teknologjinë dhe tregtinë, thotë një raport i udhëhequr nga Tony Blair dhe Jamie Dimon.
Bazuar në biseda me udhëheqës qeveritarë, biznesi dhe civilë, raporti përcakton se si një konvergjencë ndryshimesh strukturore po riformëson kombet, tregjet dhe institucionet, duke kërcënuar ato vende dhe grupime që dikur mbështeteshin te SHBA-ja për siguri, ndërsa rritnin lidhjet tregtare me Kinën.
Blair, kryeministër britanik nga viti 1997 deri në vitin 2007, dhe Dimon, kreu i JPMorgan Chase, thanë se Evropa duhej të integrohej më tej për t’i dhënë përparësi mbrojtjes dhe rritjes ekonomike.
"Nëse nuk mund të qëndrojë e vetme kundër Rusisë, do të jetë edhe më pak e aftë të menaxhojë konkurrencën sistemike me SHBA-në ose Kinën", thotë raporti i tyre.
"Reforma nuk është opsionale, është e nevojshme për të mbetur e rëndësishme”, thotë më tej raporti.
Raporti vjen ndërsa BE-ja po zhvillon një samit për të diskutuar financimin për Ukrainën dhe se si ajo mund t'i përgjigjet "peizazhit të ndryshuar për marrëdhëniet ekonomike të bazuara në rregulla", dhe ndërsa presidenti i SHBA-së, Donald Trump ushtron presion mbi bllokun, përfshirë edhe me një Strategji të re të Sigurisë Kombëtare.
Kryetarja e Komisionit të BE-së, Ursula von der Leyen, ka thënë se Evropa duhet të reformohet dhe të jetë përgjegjëse për sigurinë e vet.
Raporti gjithashtu ka përcaktuar sfidën që u paraqitet fuqive të mesme si India dhe shtetet e Gjirit nga dinamika e re, si pjesë e një pasqyre të gjerë se si gjeopolitika, inteligjenca artificiale dhe populizmi politik po e përmbysnin rendin botëror.