Zhvillim i rëndësishëm për sportin kosovar, Elvira Dushku në FIBA

Ish-basketbollistja e njohur, Elvira Dushku, pritet të nisë “epokë” të re për sportin kosovar – angazhimin e zyrtarëve nga Kosova në organizatat ndërkombëtare sportive.

Dushku ka shumë vjet që e kryen detyrën e sekretares së përgjithshme në Federatën e Basketbollit të Kosovës. Për punën që e kryen vlerësohet lartë në FBK, në komunitetin e basketbollit kosovar, por edhe të sportit kosovar në përgjithësi. Krahas detyrave si sekretare gjenerale, Dushku ka vazhduar shkollimin për menaxhment sportiv.

Së fundmi, ish-basketbollistja e Universitetit të Prishtinës, ka përfunduar me sukses programin MESGO, përkatësisht Masterin Ekzekutiv në Qeverisjen Globale në Sport. Ky është një program unik i krijuar për profesionistët e sektorit të sportit, që dëshirojnë të zotërojnë dimensionet komplekse dhe diversitetin e praktikave ndërkombëtare që lidhen me sportin profesional në nivel ndërkombëtar.

Dushku e ka diplomimin në këtë program në fillim të tetorit dhe më pas pritet ta nisë punën në Federatën Ndërkombëtare të Basketbollit (FIBA), që selinë e ka në Gjenevë të Zvicrës.

“Kjo do të bëhet në koordinim me Federatën e Basketbollit të Kosovës, pjesë e së cilës organizatë jam dhe do të vazhdoj të jem”, ka thënë Dushku të martën për KOHËN.

Edhe Sport 23 qer 2023 Arben Fetahu, nënkryetar i “FIBA Europe Youth Commission”

“Ideja është që të punoj në FIBA si menaxhere për federatat nacionale. Pra që të punoj me federata. Mund të them që është një pozitë e mesme. E njoh mirë punën e federatave dhe besoj se jam gati për këtë sfidë. Por kjo vjen në konsideratë vetëm pasi të diplomoi në Masterin që jam duke ndjekur, e të cilin do ta përfundojë në fillim të tetorit, kur edhe do të mbahet ceremonia e diplomimit”, ka shtuar Dushku.

Si ish-basketbolliste e suksesshme, Dushku asnjëherë nuk i është ndarë sportit. Ka punuar për një kohë si gazetare sportive, krahas angazhimeve si koordinatore sportive në klubin prishtinas të basketbollisteve. Ishte më pas e angazhuar në disa organizata sportive. Prej vitit 2015 është e punësuar në Federatën e Basketbollit të Kosovës, ndërsa prej vitit 2017 është sekretare e përgjithshme. Është kjo pozita kryesore ekzekutive në federatat sportive kosovare. Asnjë federatë e madhe në vend nuk ka sekretare gjenerale. Elvira Dushku është e vetmja.

Deri më tani, asnjë zyrtar nga federatat sportive kosovare nuk është punësuar në federatat evropiane apo ndërkombëtare. Për këtë arsye, Dushku do të fillojë epokë të re.

Drejtues e zyrtarë federatash sportive kosovare në fakt janë pjesë e asociacioneve ndërkombëtare, por jo si të punësuar. Kryetari i FBK-së, Arben Fetahu, është anëtar i Bordit të FIBA Evropës, ndërsa Dushku është në komisione të FIBA Evropës.

Edhe Sport 20 maj 2023 Arben Fetahu, anëtar i Bordit të FIBA Evropës

Kryetari i Federatës së Xhudos së Kosovës, Agron Kuka, është njëri prej drejtorëve sportiv të Unionit Evropian të Xhudos dhe rrjedhimisht anëtar i Komitetit Ekzekutiv të EJU-së. Në organizata ndërkombëtare prezantohen edhe hendbolli e ndonjë sport tjetër kosovar.

Edhe pas angazhimit në FIBA, Dushku nuk pritet të shkëputet nga basketbolli kosovar. Kështu FBK-ja dhe basketbolli kosovar do të kenë një krah brenda organizatës kryesore të këtij sporti.