Zgjatet në nëntë muaj periudha e kalimit të kufirit pa kontrolle të dokumenteve

Është zgjatur nga katër në nëntë muaj periudha në të cilën qytetarët e Kosovës dhe të Shqipërisë mund ta kalojnë kufirin pa kontrolle të dokumenteve identifikuese, ka njoftuar ministri i Brendshëm i Shqipërisë, Taulant Balla.

Ministritë e Brendshme të të dyja shteteve kanë nënshkruar protokollin e ri, sipas të cilit në pikëkalimin Morinë-Kukës nga 1 maji deri 30 shtator dhe 1 nëntori deri 28 shkurt qytetarët do të lëvizin pa kontrolle kufitare. 

Balla ka thënë se sidomos gjatë sezonit do të shmangen kolonat e gjata.

“Sot nënshkruajmë një protokoll të ri ndryshues të protokollit ekzistues për implementimin e kontrollit të përbashkët kufitar në pikëkalimin Morinë-Kukës të nënshkruar më 20 qershor 2022. Ne do të mundësojmë lehtësimin e procedurave të kalimit, verifikimit kufitar në pikëkalimin e përbashkët Morinë-Kukës për periudhën 1 maj-30 shtator dhe 1 nëntor-28 shkurt, pra gjithsej nëntë muaj në vit, në ndryshim nga protokolli në fuqi që parashikonte vetëm katër muaj. Nuk do të ketë kontrolle të pasaportave, të kartave të identitetit për shtetasit e të dy vendeve tona”, ka thënë Balla.