Deputeti i Lëvizjes Vetëvendosje, Arbër Rexhaj, ka deklaruar se ditët në vijim janë vendimtare për arritjen e një marrëveshjeje për zgjedhjen e presidentit, duke i bërë thirrje opozitës që të paraqesë propozime konkrete.
Sipas tij, deri të martën ekziston mundësia që të dalë një emër konsensual, i cili mund të hidhet në votim në Kuvend.
“Ditët e mbetura janë ditët e reflektimit. Deri të martën nëse ka një emër konsensual mund të provohet të votohet presidenti/ja”, ka thënë Rexhaj në “60 Minuta” të KTV-së.
Ai kritikoi partitë opozitare për mungesë të zgjidhjeve, duke theksuar se nga ajo që ka parë, ekziston një nivel i lartë i bllokadës, veçanërisht nga Partia Demokratike e Kosovës. Ndërkohë, sipas tij, Lidhja Demokratike e Kosovës po shmang ofrimin e alternativave konkrete. Me këto bllokada, Rexhaj thotë se opozita po e çon vendin drejt zgjedhjeve parlamentare.
“LDK-ja synon të barrikadohet duke mos dhënë asnjë zgjidhje konkrete, duke folur shumë e duke mos thënë asgjë”. u shpreh ai.
Rexhaj shtoi se, pavarësisht takimeve të zhvilluara, deri më tani nuk është propozuar asnjë emër konkret nga opozita. Ai theksoi se përgjegjësia për zgjedhjen e presidentit i takon të gjitha partive politike.
Edhe
Vetëvendosja ende në pritje të konsensusit për presidentin
“Në këto orë të mbetura, duhet të ketë tentativa për ta gjetur një zgjidhje. Presidenti zgjidhet me 80 vota, prandaj i takon të gjithëve përgjegjësia”, përfundoi ai.
Kuvendi ka afat deri më 28 prill ta zgjedhë presidentin e ri. Ndryshe, do të ketë zgjedhje të reja parlamentare.
