Drejtuesit më të lartë të institucioneve të Kosovës kanë bërë homazhe të enjten në kujtim të viktimave të sulmeve terroriste të 11 shtatorit 2001 në Shtetet e Bashkuara të Amerikës.
Presidentja Vjosa Osmani, kryeministri në detyrë Albin Kurti dhe kryeparlamentari Dimal Basha vendosën kurora me lule pranë pllakës përkujtimore që ndodhet në oborrin e Qeverisë së Kosovës, në afërsi të Kuvendit.
Sulmet e 11 shtatorit janë cilësuar si një nga ngjarjet më tragjike të historisë moderne amerikane. Katër aeroplanë pasagjerësh u rrëmbyen nga anëtarë të organizatës terroriste Al-Kaida: dy prej tyre u përplasën në Kullat Binjake në New York, një në Pentagon, ndërsa i katërti u rrëzua në Pensilvani, pasi pasagjerët tentuan të zmbrapsnin rrëmbyesit.
Homazhet e sotme, përveçse nderim për mbi 3 mijë viktimat e asaj dite tragjike, siç deklaroi Kurti, janë shprehje e mirënjohjes dhe solidaritetit të popullit të Kosovës me SHBA-në.