Tri kompani ankohen për tenderin që po e heton edhe Prokuroria

Dy kompani pjesëmarrëse në tenderin për furnizim me shtretër dhe pajisje të dializës për Klinikën e Nefrologjisë në QKUK kanë dorëzuar ankesa në Organin Shqyrtues të Prokurimit, duke pretenduar për shkelje ligjore dhe favorizim të operatorit fitues. Ankesë ka paralajmëruar se do të bëjë edhe një kompani tjetër

Dy kompani pjesëmarrëse në tenderin për furnizim me shtretër dhe pajisje të dializës për Klinikën e Nefrologjisë në QKUK kanë dorëzuar ankesa në Organin Shqyrtues të Prokurimit.

Ankesat janë bërë pas vendimit të Qendrës Klinike Universitare të Kosovës, për të shpallur fituese kompaninë “Medi Health” për tenderin në vlerë prej 843,750 eurosh.

Në ankesën e saj kompania “Ko Med” pretendon se është eliminuar padrejtësisht me arsyetime teknike të pasakta dhe se kërkesa e tyre për rishqyrtim nuk është trajtuar me prova. 

"Jemi eliminuar si kinse të papërgjegjshme nga ana e Autoritetit Kontraktues me një arsyetim banal se kinse nuk janë përmbushur kërkesat teknike për aparatet e dializës dhe se nuk është dëshmuar se këto aparatura janë të instaluara në të paktën tri shtete të Bashkimit Evropian. Moskërkimi i informacioneve sqaruese tregon se Autoriteti Kontraktues ka pasur për qëllim eliminimin dhe diskriminimin e ofertës sonë dhe favorizimin e operatorit të rekomanduar për dhënie të kontratës”, thuhet në ankesën e “Ko Med".

Ndërkohë nga kompania “Medicom” e konsiderojnë tenderin të manipuluar. 

“Ofertimi ynë ishte 30% më i lirë (260.000 € më pak) se konkurrenti. Ne dyshimet se kemi pasur të bëjmë me tender të ‘manipuluar’ dhe deformim të kërkesave të specifikave teknike për të përshtatur vetëm një prodhues të caktuar, i cili gjithashtu nuk i plotëson kushtet e dosjes së tenderit. Kjo ka çuar në eliminimin e pajustifikuar të pajisjeve Fresenius Medical Care – Gjermani, i cili është lider global në këtë fushë dhe mbi 50% të tregut botëror e mbi 60% të tregut evropian e zotëron ky prodhues. Autoriteti Kontraktues nuk ka kërkuar sqarime shtesë për dokumentacionin, por ka eliminuar ofertën direkt, gjë që është shkelje ligjore sipas nenit 72 të Ligjit për Prokurimin Publik”, thuhet në ankesën e kompanisë "Medicom".

E nga kompania “Argo Med” kanë deklaruar se edhe pse kishin përmbushur të gjitha kriteret, janë eliminuar nga gara, për të cilën kanë njoftuar se do të ankohen në OSHP të hënën.

KOHA pati raportuar edhe një javë më parë për këtë tender, për të cilin ishin ngritur dyshime se ishte favorizuar kompania fituese. 

Nga Prokuroria Themelore në Prishtinë kanë konfirmuar për KOHËN se rasti është duke u hetuar.

“Prokuroria Themelore në Prishtinë është duke trajtuar këtë rast dhe hetimet janë ende në zhvillim. Rasti është i hapur dhe janë duke u ndërmarrë veprime hetimore në mbledhjen e provave për të vërtetuar nëse ka pasur shkelje gjatë procedurës së prokurimit publik. Duke qenë se hetimet janë aktive, në këtë fazë nuk mund të japim detaje të tjera specifike, për të mos cenuar procesin hetimor”, thuhet në përgjigjen e Prokurorisë.

Nga kompania fituese “Medi Health” nuk kanë kthyer përgjigje në pyetjet e dërguara nga KOHA, ndërsa nuk kanë qenë të qasshëm as në numrin e kontaktit të shënuar në Agjencinë e Regjistrimit të Bizneseve të Kosovës.

KOHA ka dërguar pyetje edhe në QKUK që nga data 28 gusht lidhur me pretendimet e operatorëve ekonomikë, mirëpo deri më tani nuk ka marrë asnjë përgjigje.