Njohësi i çështjeve të arsimit, Rinor Qehaja, ka deklaruar se pjesëmarrja e nxënësve të Kosovës në testin ndërkombëtar PISA është e paarsyeshme derisa nuk ka ndryshim të sistemit të arsimit.
Të enjten në “Interaktiv” të KTV-së, Qehaja ka thënë se çdo test ndërkombëtar si PISA e rikthen vëmendjen në problemet e vërteta, mirëpo sipas tij, përgjegjësia është institucionale karshi të rinjve të vendit për t’iu garantuar një sistem cilësor arsimor.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Gjithmonë e kemi atë pikëpyetjen se a është e arsyeshme pjesëmarrja në testin PISA kur nuk kemi një ndryshim substancial brenda sistemit. Një logjikë e shëndoshë thotë që jo, pasi që këta 15-vjecarë që janë pjesëmarrës në këtë testim duhet të kalojnë nga klasa e parë deri në të 10-tën në një sistem shumë më ndryshe të mësimnxënies sesa ai që e ka në epiqendër të mësuarit mekanik, në mënyrë që të ketë një përmirësim në rezultatet e testit, në të kundërtën rezultati është ai sikurse në testimet e mëparshme, pasi që në epiqendër është të mësuarit tradicional përmendësh. Testi i PISA-s në tërësi i shërben politikëbërjes. Shtetet paguajnë pjesëmarrjen, marrin pjesë në mënyrë që të identifikojnë këshilla për zhvillim, intervenime në nivel të politikave”, ka thënë Qehaja.
Ai ka shtuar se mungesa e llogaridhënies është e shpërndarë jo vetëm te mësimdhënësit, por edhe më gjerë në institucione deri te Ministria e Arsimit.
“Në mungesë të llogaridhënies të shpërndarë gjithandej në të gjitha nivelet, edhe te zyrtarët komunalë, edhe te drejtoritë komunale të arsimit, deri te Ministria e Arsimit duhet të ketë përgjegjësi, përgjegjësi të instaluar që e prek nxënësin në klasë. Në momentin që e kemi këtë atëherë padyshim vjen edhe një vullnet i mësimdhënësit për performancë më të mirë”, është shprehur ai.