Një person i maskuar dyshohet se ka tentuar të grabisë një pikë karburanti në Prishtinë, duke kërcënuar 2 punëtorë me thikë.
Ngjarja ka ndodhur më 13 nëntor, rreth orës 21:37, në rrugën “Lidhja e Lezhës”.
Sipas raportit të Policisë së Kosovës, i dyshuari u kishte kërkuar para punëtorëve, por pasi nuk kishte arritur t'i merrte, kishte hequr maskën dhe ishte larguar.
“I dyshuari, pasi nuk ka arritur të marrë para, e kishte hequr maskën duke u thënë ankuesve se ‘ka bërë shaka’ dhe ishte larguar nga vendi i ngjarjes”, thuhet në raportin policor.
Pas një kohe, i dyshuari është paraqitur te zyrtarët policorë që ndodheshin në vendin e ngjarjes.
Policia ka konfiskuar thikën që dyshohet se ishte përdorur gjatë incidentit.
Pas intervistimit, me urdhër të prokurorit, i dyshuari është liruar në procedurë të rregullt.