Policia gjen një armë e municion në shtëpinë e të arrestuarit për rastin e Vukashinoviqit

I arrestuar është Vidosav Mitroviq, i dyshuar për ndihmë në tentimvrasjen dhe rrëmbimin e Milan Vukashinoviqit, i cili më 1 nëntor është qëlluar me breshëri plumbash në Jellakcë të Leposaviqit dhe më pas është rrëmbyer nga persona të panjohur në Serbi. Avokati i Mitroviqit, Dejan Vasiq, ka thënë se gjatë intervistimit i dyshuari e ka mohuar se ka ndihmuar në rastin e Vukashinoviqit

Policia e Kosovës ka njoftuar të dielën se gjatë bastisjes së shtëpisë dhe objekteve përcjellëse të të arrestuarit për përfshirje në plagosjen dhe rrëmbimin e dyshuar të shtetasit të Kosovës, Milan Vukashinoviq, ka gjetur një armë dhe disa fishekë.

“Gjatë bastisjes janë gjetur dhe sekuestruar si prova materiale: nëntë telefona celularë, një laptop, tri dokumente të formatit A4, një pushkë gjuetie me 39 fishekë, një jelek për fishekë të armës së gjuetisë, si dhe një tytë arme. I dyshuari pas intervistimit me vendim të prokurorit është dërguar në mbajtje”, thuhet në raportin 24-orësh të Policisë.

I arrestuar është Vidosav Mitroviq, i dyshuar për ndihmë në tentimvrasjen dhe rrëmbimin e Milan Vukashinoviqit, i cili më 1 nëntor është qëlluar me breshëri plumbash në Jellakcë të Leposaviqit dhe më pas është rrëmbyer nga persona të panjohur në Serbi. 

Avokati i Mitroviqit, Dejan Vasiq, ka thënë se gjatë intervistimit i dyshuari e ka mohuar se ka ndihmuar në rastin e Vukashinoviqit. 

“I dyshuari Vidoslav ka dhënë deklaratë për rastin dhe e ka mohuar plotësisht pjesëmarrjen në ngjarje duke u thirrur në një alibi që është lehtë e verifikueshme. Ai ndodhet në ndalim 48-orësh, ndërsa ecuria e procedurës varet më tutje prej Gjykatës Themelore në Themelore në Mitrovicë”, ka thënë Vasiqi për KOHËN. 

Seanca për masën e sigurisë ndaj të pandehurit Mitroviq pritet të mbahet të hënën. 

Mbrëmjen e 20 dhjetorit ministri në detyrë i Punëve të Brendshme, Xhelal Sveçla, ka thënë se i arrestuari V.M. ka qenë pjesëtar i Ministrisë së Brendshme të Serbisë dhe më pas ishte integruar në Policinë e Kosovës. Sipas Sveçlës, më pas ai ka dhënë dorëheqje nga Policia e Kosovës.

“Ekzistojnë dyshime të bazuara se personi i arrestuar ka bashkëpunuar dhe ka mbështetur në vazhdimësi strukturat e sigurisë së Serbisë, përfshirë edhe kidnapimin e Milan Vukashinoviqit, i cili gjatë kidnapimit u plagos rëndë dhe aktualisht është duke u trajtuar në një spital në Serbi”, ka shkruar Sveçla në Facebook mbrëmjen e 20 dhjetorit.

Sipas autoriteteve të Kosovës, Vukashinoviqi dyshohet se u plagos dhe më pas u rrëmbye në fshatin Jellakcë, afër Leposaviqit më 1 nëntor, para se të dërgohej në spitalin e Prokuples, e më pas në Qendrën Klinike të Nishit. Institucionet e Kosovës besojnë se motiv i rrëmbimit dhe tentimvrasjes së tij është fakti që ai nuk i bindej Listës Serbe dhe urdhrave të Serbisë për ta lënë punën në Byronë Kosovare të Sigurimeve.

Familja e Vukashinoviqit ka dorëzuar padi në Serbi kundër disa pjesëtarëve të Ushtrisë së Serbisë, ose Ministrisë së Punëve të Brendshme të Serbisë, ose Milan Radoiçiqit, ish-nënkryetar i Listës Serbe, i cili ka marrë përgjegjësinë për sulmin vdekjeprurës ndaj Policisë së Kosovës në Banjskë të Zveçanit më 2023.

Vukashinoviqi ka qenë i punësuar në Byronë e Sigurimeve të Kosovës në pikën kufitare në Jarinjë, në veri të Kosovës.

Kryeministri në detyrë i Kosovës, Albin Kurti, ka deklaruar më herët se Vukashinoviqi u sulmua sepse kundërshtonte “politikat e regjimit të presidentit të Serbisë, Aleksandar Vuçiq”.