Abelard Tahiri, deputet i PDK-së, ka kërkuar që të anulohet tërësisht vendimi për tiketat ngjitëse, të cilat duhej të vendoseshin ë vetura pasi të kalonin kontrollin teknik.
Sot është marrë vendim nga Ministria e Infrastrukturës për pezullim të këtij vendimi, pasi ngjalli reagime të shumta.
“Ne nuk pajtohemi vetëm ne pezullimin e kësaj takse, ne kërkojmë me u anulu. Siç thotë një fjalë popullore, ne ia kemi zëne Qeverisë dorën në xhep, e mirë që nuk kemi lejuar me ua marrë paret”, ka thënë Tahiri.
Ndërkohë, deputeti i LDK-së, Armend Zemaj, ka thënë që ministri Aliu duhet t’i drejtohet Prokurorisë për këtë që ka ndodhur.
“Jo edhe një jo të madhe z. ministër. Kjo qasje është më shumë shqetësuese sesa tendenca për me fsheh. Unë po shpresoj se ministri do të çohet nga seanca e me shku në prokurori që me hetu këtë proces. Kjo nuk mbulohet kështu. Akti më korrekt më moral do të ishte dorëheqja për më tregu që qeveria nuk qëndron prapa këtij skandali. Kështu nuk tejkalohet. Nuk mund të kalohet në këtë formë. Ne kërkojmë përgjegjësi publike morale”, ka thënë Zemaj.
Ndërsa, Bekë Berisha nga AAK-ja ka thënë se ka nevojë për sqarime për të.
“E para ka për taksën 5 euro. Është enigmatike dhe e nevojshme të sqarohet se kush e ka nënshkruar këtë kontratë a është ligjore dhe pse pikërisht 5 euro”, tha ai.
